সততে নাগৰিকত্ব সংশোধনী বিধেয়ক (CAB) আনিব বুলি সদম্ভ ঘোষণা কৰি অহা কেন্দ্ৰীয় গৃহ মন্ত্ৰী অমিত শ্বাহে শনিবাৰে মিজোৰামত CAB সন্দৰ্ভত কোনোধৰণৰ মন্তব্য দিয়াৰ পৰা বিৰত থাকিল।
মিজোৰামৰ ৰাজধানী আইজলত নৰ্থ-ইষ্ট কাউঞ্চিলে আয়োজন কৰা ‘উত্তৰ-পূব হস্ততাঁত আৰু হস্তশিল্প প্ৰদৰ্শনী’ উদ্বোধনৰ উদ্দেশ্যে আজি অমিত শ্বাহ আইজলত উপস্থিত হয়।
উল্লেখযোগ্য যে গৃহ মন্ত্ৰী হিচাপে দায়িত্বভাৰ গ্ৰহণৰ পিছত এইটো অমিত শ্বাহৰ প্ৰথম উত্তৰ-পূব ভ্ৰমণ। আনহাতে মিজোৰামত উপস্থিত হৈ তেওঁ CAB বিৰোধী বিভিন্ন সংগঠনৰ প্ৰতিবাদৰ সন্মুখীন হয়।
বিভিন্ন ছাত্ৰ সংগঠন, নাগৰিক সমাজকে ধৰি ৰাজ্যখনৰ বিধেয়ক বিৰোধী জনসাধাৰণে ৰাজপথলৈ উলাই আহি তীব্ৰ প্ৰতিবাদ সাব্যস্ত কৰে। মিজো জিৰ্লাই পল (MZP)এ CABৰ বিৰোধিতাত মিজোসকলে সাধাৰণতে শৱযাত্ৰাৰ সময়ত পিন্ধা ক’লা কাপোৰ পিন্ধী প্ৰতিবাদত জনায়।
আনহাতে নিজৰ ভাষণত গৃহ মন্ত্ৰী গৰাকীক CAB আৰু NRCক লৈ কোনোধৰণৰ মন্তব্য দিয়া দেখা নগ’ল। ইয়াৰ পৰিৱৰ্তে তেওঁৰ ভাষণত কেৱল কেন্দ্ৰীয় চৰকাৰৰ ‘বিকাশৰ এজেণ্ডাই’ স্থান পায়।
তেওঁ কয়, ‘হস্তশিল্পই উত্তৰ-পূবত নিয়োগৰ যথেষ্ট সুযোগ সৃষ্টি কৰাৰ লগতে জনসাধাৰণৰ উন্নয়ণ আৰু বিকাশত গুৰুত্বপূৰ্ণ ভূমিকা গ্ৰহণ কৰিব পাৰে’।
‘নৰেন্দ্ৰ মোদী চৰকাৰৰ প্ৰথমটো কালত, বাঁহগছক পৰিৱেশ সংক্ৰান্তিয় কাৰণত কটাত নিষেধাজ্ঞা থকা গছসমূহৰ তালিকাৰ পৰা ৰেহাই দিয়া হৈছিল। এই সিদ্ধান্তৰ দ্বাৰা চৰকাৰে হস্তশিল্প থণ্ডত বাঁহৰ সুলভতা বৃদ্ধি কৰিলে’ তেওঁ কয়।
অহা ২০২১ চনৰ ভিতৰত আইজলক ব্ৰডগজ ৰেইলৱেৰ দ্বাৰা সংযোগ কৰা হ’ব বুলি উল্লেখ কৰি তেওঁ কয়, ‘মিজোৰামত, যোৱা ৫টা বছৰত একাধিক বিকাশৰ আঁচনি গ্ৰহণ কৰা হৈছে, ইয়াৰ ভিতৰত ৬০ মেগাৱাট টুইৰিয়াল জল-বিদ্যুৎ প্ৰকল্প অন্যতম।’
পূৰ্বৰ ইউ পি এ চৰকাৰৰ প্ৰসংগ উত্থাপন কৰি শ্বাহে কয় যে ত্ৰয়োদশ বিত্ত আয়োগৰ সময়ত মিজোৰামক ১৯.৯৭০ কোটি টকা আবণ্টন কৰা হৈছিল, আনহাতে চতুৰ্দশ বিত্ত আয়োগৰ সময়ত মোদী চৰকাৰে মিজোৰামৰ বিকাশৰ বাবে ৪২.৯৭০ কোটিতকৈ অধিক টকা খৰচ কৰিছে।
