প্ৰদূষিত ভাৰত! এছিয়াৰ শীৰ্ষ দহখন প্ৰদূষিত চহৰৰ তালিকাত আঠখনেই ভাৰতৰ

দিপাৱলীৰ আনন্দৰ সময়ত দেশত বৃদ্ধি পাবলগীয়া সম্ভাৱ্য প্ৰদূষণময় পৰিস্থিতিৰ প্ৰাকমুহূৰ্তত প্ৰকাশিত এক সমীক্ষাই দেশৰ সাম্প্ৰতিক প্ৰদূষিত পাৰিপাৰ্শ্বিক অৱস্থাক সমুখলৈ আনিছে। ‘ৱৰ্ল্ড এয়াৰ কোৱালিটি ইনডেক্স’ – ৰ সমীক্ষাত এছিয়াৰ শীৰ্ষ ১০ খন প্ৰদূষিত চহৰৰ তালিকাত স্থান লাভ কৰিছে আঠখন ভাৰতীয় চহৰে।

ভাৰতীয় চহৰ গুৰুগ্ৰাম এই তালিকাৰ শীৰ্ষত আছে। দেওবাৰে পুৱা চহৰখনত বায়ু মানদণ্ড সূচক ‘AQI’- ৰ মান আছিল ৬৭৯। ৰেৱাৰীৰ কাষৰীয়া ধাৰুহেৰা চহৰ ৫৪৩ AQI আৰু বিহাৰৰ মুজাফ্ফৰপুৰ ৩১৬ AQI- ৰে ইয়াৰ পাছত থাকে।

তালিকাত থকা আন ভাৰতীয় চহৰসমূহ হৈছে টালকেটৰ, লক্ষ্ণৌ (২৯৮ AQI), ডিআৰচিচি আনন্দপুৰ, বেগুচৰাই (২৬৯ AQI), ভূপাল চৌৰাহা, দেৱাছ (২৬৬ AQI), খড়কপাড়া, কল্যাণ (২৫৬ AQI), দৰ্শন নগৰ আৰু ছপ্ৰা (২৩৯ AQI)।

লক্ষণীয়ভাৱে প্ৰদূষণৰ মাত্ৰাই ভয়াৱহ ৰূপ লোৱা দেশৰ ৰাজধানী চহৰ দিল্লী এই তালিকাৰ পৰা বাদ পৰে। ভাৰতীয় চহৰসমূহৰ উপৰিও চীনৰ লুঝৌৰ জিয়াওশিচাং বন্দৰ আৰু মঙ্গোলিয়াৰ উলানবাটাৰ বায়াংখোচু চহৰে এই তালিকাখনত স্থান পায়।

ইফালে এছিয়া মহাদেশৰ শীৰ্ষ ১০ খন শ্ৰেষ্ঠ বায়ু মানদণ্ড অঞ্চলৰ তালিকাত ভাৰতৰ কেৱল এখন চহৰে স্থান লাভ কৰিবলৈ সক্ষম হৈছে। অন্ধ্ৰ প্ৰদেশৰ ৰাজমহেন্দ্ৰভাৰামে এই তালিকাত স্থান লাভ কৰে।

উল্লেখ্য যে বায়ু মানদণ্ড সূচক ‘AQI’- অনুসৰি ০-৫০ লৈ ভাল, ৫১-১০০ লৈ মধ্যমীয়া, ১০১-১৫০ লৈ সংবেদনশীল গোটৰ বাবে অস্বাস্থ্যকৰ, ১৫১-২০০ লৈ সকলো গোটৰ বাবে অস্বাস্থ্যকৰ হিচাপে, ২০১-৩০০ লৈ অতি অস্বাস্থ্যকৰ আৰু ৩০১-৫০০ লৈ মানৱ স্বাস্থ্যৰ বাবে বিপদজনক বুলি গণ্য কৰা হয়।