জীৱশ্ৰেষ্ঠ মানৱৰূপী দানৱৰ নিৰ্লজ কাণ্ডই পুনৰবাৰ কঁপাই গৈছে অসম। চুমিলা ৰংহাংপীৰ পাছতে গোগামুখৰ চাউলধোৱাত ১৭ টা নৰপিশাচৰ কামনাৰ বলি হ’ল দ্বীপশিখা শইকীয়া।
আনকি ধৰ্ষণ কৰি হত্যা কৰি আত্মহত্যাৰ ৰূপ দিবলৈ চেষ্টা কৰিলে ধৰ্ষণকাৰীকেইটাই। গোগামুখৰ চাওলধোৱা আৰক্ষী চকীৰ অন্তৰ্গত থেকেৰা গুৰিৰ শংকৰদেৱ শিশু নিকেতনত অধ্যয়নৰত চতুৰ্থ শ্ৰেণীৰ ছাত্ৰী ৯ বছৰীয়া কনমানিজনী যেন ঘৰত অকলে থকাটোৱেই পাপ হ’ল। ঘৰত কোনো নথকাৰ সুযোগ লৈ মঙ্গলবাৰে কনমাণিজনীক ধৰ্ষণ কৰি গামোচাৰে ঘৰতে ওলোমাই থৈ যায় আৰু আত্মহত্যাৰ ৰূপ দিয়াৰ চেষ্টা কৰে।
অৱশ্যে, চাউলধোৱা আৰক্ষীয়ে কেইবাজনো অভিযুক্তক গ্ৰেপ্তাৰ কৰিছে যদিও বৰ্তমান যেন ছ’চিয়েল মিডিয়াত বিষয়টোক লৈ তীব্ৰ ক্ষোভ উজাৰিছে সচেতন মহলে। সকলোৰে কেৱল এটাই দাবী ‘ধৰ্ষণকাৰীক ফাঁচি দিয়ক।‘
ইপিনে, চুমিলা ৰংহাংপিৰ দোষীয়ে উচিত শাস্তি লাভ নকৰাকৈ বা পৰিয়ালে ন্যায় নৌপাওতেই এনে এটা পাশৱিক ঘটনা সংঘটিত হোৱাৰ পাছতে একাংশ মহিলাই ফেচবুকত পোষ্ট দিবলৈ আৰম্ভ কৰিছে ‘হাতযোৰ কৰিছো, কন্যা সন্তান জন্ম নিদিব।‘
কিছু সংখ্যকে ইয়াৰ কাৰণ বাখ্যা কৰি লিখিছে, ‘কিমান আৰু নিজৰ কন্যা সন্তানক কিছুমান নৰপিশাছৰ কামনাৰ বলি হ’বলৈ এৰি দিম? কন্যা সন্তান জন্ম দিয়াটোৱেই পাপ নেকি?’
এই সন্দৰ্ভত কন্ঠশিল্পী সুৱাসনা দত্তইয়ো ফেচবুকত ক্ষোভ উজাৰি লিখি কয়, ‘এই নৰপিশাচকেইটাৰ ফাঁচীৰ দাবী জনাইছো ৷ পুলিচ প্ৰশাসন আৰু ন্যায়পালিকালৈ কাতৰ অনুৰোধ- কণমাণি দ্বীপশিখাৰ ধৰ্ষণকাণ্ডৰ লগত জড়িত কোনো এজন অপৰাধীয়ে যাতে সাৰি যাব নোৱাৰে ৷’
আনহাতে, এই সন্দৰ্ভত মন্ত্ৰী পিযুষ হাজৰিকাৰ পত্নী তথা অভিনেত্ৰী আইমী বৰুৱাইয়ো ক্ষোভ উজাৰি ফেচবুকত লিখি কয়, ‘প্ৰতিবাদ কৰিবলৈ, ন্যায় বিচাৰি Hashtag Justice for বুলি লিখিবলৈ দুখ লগা হৈছে। ইমান বছৰে ইটোৰ পাছত সিটো ধৰ্ষণ হৈয়েই আছে, আমি সামাজিক মাধ্যমত প্ৰতিবাদ কৰি আছোঁ, ক্ষোভ উজাৰিছো, কিন্তু সমাধান ক’ত ! শিপাৰ পৰাই যেন ক্ৰমাৎ বিকৃতি ঘটিছে মানুহৰ মানসিকতাত।‘
‘ধৰ্ষণকাৰীক কৰায়ত্ত কৰিলেই সেই নিস্পাপ প্ৰাণবোৰে ন্যায় পাবনে ? দুই এটা ঘটনাৰ বাবে দোষীক শাস্তি দিয়া পৰিলক্ষিত হয়। কিন্তু স্থায়ী সমাধান ক’ত ? কেতিয়া আমাৰ সমাজৰপৰা এই পিশাচবোৰ নিৰ্মূল হ’ব। হৈ যোৱা ঘটনাটোৱে কঁপাই আছে এতিয়াও, সুস্থিৰ হ’ব পৰা নাই। এই সময় ,মানুহৰ মানসিকতাত সঁচাকৈয়ে ঘূণে ধৰিছে। প্ৰয়োজন স্থায়ী সমাধানৰ। এনে ঘটনাবোৰ সংঘটিত হোৱাৰ কাৰণসমূহ ফঁহিয়াই চাই তাৰ যুক্তিযুক্ত সমাধানসূত্ৰ লাগে আমাক, সমাজখন, মানুহৰ মানসিকতাবোৰ নিকা কৰা প্ৰয়োজন। ঈশ্বৰৰ ওচৰত কাতৰ প্ৰাৰ্থনা, এনে ঘটনা আৰু সংঘটিত নহওক। মানুহৰ মনৰ কলুষতাবোৰ নিৰ্মূল হওক।‘ আইমী বৰুৱাই এইদৰে লিখি কয়।
সেইদৰে অভিনেত্ৰী নিশিতা গোস্বামীয়ে কয়, “আৰক্ষী আৰু ন্যায়পালিকালৈ অনুৰোধ যে অতি শীঘ্ৰে এক দৃষ্টান্তমূলক শাস্তি দি কনমানিটোৰ আত্মাক শান্তি দিয়ক। এটা কথা সত্য যে এনে ঘটনাৰ বাবে দোষীবোৰ প্ৰায়ে অশিক্ষিত নাইবা শিক্ষিত হৈও কাণ্ডজ্ঞান নোহোৱা মানুহ। এনে লাগে যে এই নৰ পিশাচবোৰ আমাৰ সমাজে ঢুকি পোৱা অৱস্থাত নাই। এজন ধৰ্ষণকাৰীক শাস্তি দিয়াৰ পাছতো এই তিঘিল ঘিলাই থকা কিছুমান নৰখাদকে শাস্তিৰ খবৰেই নাপায়। ইহঁতে চিকাৰ বিচাৰি ঘুৰ্মূটিয়াই ফুৰে। ধৰ্ষণকাৰীক শাস্তি দিয়াৰ লগতে সমাজত লুকাই থকা এনে সম্ভাৱনাপূৰ্ণ ধৰ্ষণকাৰী বা হত্যাকাৰীবোৰকো চিনাক্ত কৰা এক পদ্ধতি বা উপায় বিচাৰিব লাগিব। বিপদ হৈ যোৱাৰ পাছত হাহাকাৰ কৰি থকাতকৈ সমাজে একগোট হৈ সময়ে সময়ে এই বিষয়ক কাম কৰিব লাগিব। চৰকাৰেও এনে ঘটনা নিয়ন্ত্ৰণৰ বাবে এক পৃথক বিভাগ (ৰাষ্ট্ৰীয় স্তৰত) বনাব লাগিব। হয়তো ইয়াতকৈও বহুত ভাল সমাধান ওলাব; কেৱল এই ঘটনাই শেষ হ’ব লাগে!’’
উল্লেখযোগ্য যে, কিছুদিন পূৰ্বে অৰ্থ্যাৎ ২২ এপ্ৰিলত ৰহা খাইগড়ত প্ৰকাশ বৰঠাকুৰৰ ঘৰত বনকৰা ছোৱালী চুমিলা ৰংহাংপীৰ মৃতদেহ উদ্ধাৰৰ পাছতে দোষীক উচিত শাস্তি দাবী কৰি বহু জাতীয় সংগঠনে প্ৰতিবাদ সাব্যস্ত কৰিছিল।
তাৰ পাছতে একেই ধৰণে কণমানি দ্বীপশিখাক হত্যা কৰাৰ পাছত এতিয়া যেন ন্যায় ব্যৱস্থাৰ ওপৰত আস্থা হেৰুৱাই আন একাংশই লিখিছে ‘ৰঙাঘৰত আৰামৰে আমাৰ টকাৰে নৰপিশাচ কেইটাক পোহপাল দি থকাতকৈ ৰাজপথত ৰাজহুৱাভাৱে ফাঁচি দিয়ক, ধৰ্ষণৰ মাত্ৰা নাইকিয়া হ’ব।‘
মানৱ সমাজক কলুষিত কৰা এনে নিৰ্ল্লজ্জ ঘটনা যাতে পুনৰ সংঘটিত নহওঁক সেয়াই এতিয়া সকলোৰে কামনা।
