এটা লাইভ অনুষ্ঠানত যুদ্ধ বিৰোধী পোষ্টাৰ তুলি ধৰি চৰ্চালৈ অহা ৰাছিয়াৰ মহিলা সাংবাদিক মেৰিনা অ’ভচিয়ানিকোভাক পলাতক ঘোষণা কৰা হৈছে। ৰাছিয়াৰ চৰকাৰী সংবাদ মাধ্যম টাছৰ প্ৰতিবেদনত কোৱা হৈছে যে মেৰিনাক বৈদেশিক পৰিক্ৰমা মন্ত্ৰালয়ৰ ‘ৱান্টেড’ৰ তালিকাত ৰখা হৈছে।
বিদেশ মন্ত্ৰালয়ৰ উদ্ধৃতিৰে টাছে প্ৰতিবেদনত কৈছে যে ১৯৭৮ চনৰ ১৯ জুনত প্ৰাক্তন ছোভিয়েট দেশ ইউক্ৰেইনৰ ওডেছা চহৰত মেৰিনা অ’ভচিয়ানিকোভাৰ জন্ম হৈছিল। ৰাছিয়ান ফেডাৰেচনৰ ফৌজদাৰী আইনৰ ব্যৱস্থা অনুসৰি তেওঁক পলাতক হিচাপে তালিকাভুক্ত কৰা হৈছে।
উল্লেখ্য যে যোৱা ১৫ মাৰ্চৰ সন্ধিয়া ৰাছিয়াৰ চৰকাৰী ‘চেনেল ৱান’ত এগৰাকী মহিলাই বাতৰি পঢ়ি আছিল। সেই সময়তে চেনেলটোৰ সাংবাদিক মেৰিনা তাত যুদ্ধ বিৰোধী প্লেকাৰ্ড লৈ উপস্থিত হৈছিল। তেওঁৰ প্লেকাৰ্ডখনত লিখা আছিল, “যুঁদ্ধ নহয়, যুদ্ধ বন্ধ কৰক, প্ৰচাৰত বিশ্বাস নকৰিব, তেওঁলোকে ইয়াত মিছা কৈ আছে।”
লগতে পঢ়ক: কিম জঙৰ কীৰ্তি! এইবাৰ জাপানৰ ওপৰেৰে বেলিষ্টিক মিছাইল নিক্ষেপ কৰিলে উত্তৰ কোৰিয়াই
আদালতে এই গোচৰটোত চলিত মাহৰ ৯ অক্টোবৰলৈকে মেৰিনাক গৃহবন্দী কৰি ৰখাৰ নিৰ্দেশ দিছিল।
মেৰিনাৰ প্ৰাক্তন স্বামী ইগৰ অ’ভিচিয়াননিকভে শনিবাৰে কয় যে মেৰিনাই তেওঁৰ কন্যাৰ সৈতে গৃহবন্দিত্বৰ পৰা পলাই গৈছে।
মেৰিনাৰ অধিবক্তা দিমিত্রি জাখভাটভে এক প্ৰশ্নৰ উত্তৰত কয়, “মেৰিনা তেওঁৰ কন্যাৰ সৈতে পলাই গৈছে নে নাই মই ক’ব নোৱাৰো, কিন্তু মই জানো তেওঁ পলাই গৈছে।‘’
