কৰ’না ভাইৰাছৰ চিকিৎসাৰ ক্ষেত্ৰত মাৰ্কিন বিজ্ঞানীসকলে নতুন দিশৰ সন্ধান দিছে। কৰ’নাৰ বিৰুদ্ধে এন্টিভাইৰেল দৰৱ ৰেমছিডিছিভিৰ(Remdesivir) প্ৰয়োগত সুফল লাভ কৰা বুলি দাবী কৰিছে হোৱাইট হাউছে।
গোটেই বিশ্ব কৰ’নাৰ সংহাৰৰ ত্ৰাসত ত্ৰস্তমান হৈ থকাৰ সময়ত এই বাইৰাছত আক্ৰান্তসকলৰ চিকিৎসাৰ বাবে কোনো অনুমোদিত দৰৱ নাই।
বিশ্বৰ বিভিন্ন দেশে কোনো কাৰ্যকৰী দৰৱ আৱিষ্কাৰৰ বাবে গৱেষণাত ব্ৰতী হৈ আছে। দেশসমূহে এতিয়ালৈকে মেলেৰিয়াৰ দৰৱ হাইড্ৰক্সিক্লৰ’কুইনৰ ওপৰতে ভৰসা কৰিছে।
ইয়াৰ মাজতে কৰ’না ভাইৰাছৰ চিকিৎসাত ৰেমছিডিছিভিৰ সফলতাক লৈ মাৰ্কিন বিজ্ঞানীৰ দাবীয়ে বিশ্বত এক আশাৰ সঞ্চাৰ কৰিছে।
আমেৰিকাৰ নেশ্যনেল ইনষ্টিটিউট অফ এলাৰ্জী এণ্ড ইনফেকছিয়াছ ডিজিজৰ মুৰব্বী এন্থনী ফৌচিয়ে হোৱাইট হাউছত সংবাদ মাধ্যমৰ আগত কয় যে পৰিসংখ্যা অনুসৰি, কৰ’না আক্ৰান্তসকলৰ ওপৰত ৰেমছিডিছিভিৰ প্ৰয়োগৰ ফলত ৰোগীসকল দ্ৰুতভাৱে সুস্থ হৈ উঠিছে।
তেওঁ দাবী কৰা মতে, আন দৰৱৰ তুলনাত ৰেমছিডিছিভিৰ প্ৰয়োগৰ ফলত সুস্থতাৰ হাৰ ৩০শতাংশ অধিক। মানৱ শৰীৰৰ ভিতৰত প্ৰৱেশ কৰি ভাইৰাছৰ বৃদ্ধি ৰোধ কৰাৰ দৰে সক্ষমতা ৰেমছিডিছিভিৰ আছে।
ইতিমধ্যে, আমেৰিকা, য়ুৰোপ, এছিয়াৰ মুঠ ৬৮টা স্থানত ১,০৬৩গৰাকী কৰ’না আক্ৰান্ত লোকৰ দেহত পৰীক্ষামূলকভাৱে ৰেমছিডিছিভি দৰৱ প্ৰয়োগ কৰা হৈছে আৰু ইয়াত সুফল লাভ কৰা বুলি দাবী কৰা হৈছে। তদুপৰি, কৰ’নাৰ চিকিৎসাৰ বাবে ৰেমছিডিছিভি প্ৰয়োগৰ অনুমতি বিচাৰি আবেদনো কৰা হৈছে।
আমেৰিকাৰ নেশ্যনেল ইনষ্টিটিউট অফ হেলথে কৰ’নাৰ বহুকেইটা দৰৱক লৈ পৰীক্ষা-নিৰীক্ষা চলাইছে। ইয়াৰ ভিতৰত ৰেমছিডিছিভিও আছে।
গিলেড ছাইন্সে প্ৰস্তুত কৰা এই দৰৱটো ইবোলাৰ বিৰুদ্ধে পৰীক্ষা কৰা হৈছিল যদিও তাত বিশেষ সফলতা পোৱা নগ’ল। কিন্তু বিভিন্ন জন্তুৰ শৰীৰত চলোৱা কেইবাটাও পৰীক্ষাৰ পাছত দৰৱটো কোভিড-১৯, ছাৰ্ছকে ধৰি ভাইৰাছৰ সংক্ৰমণ ৰোধ কৰা তথা চিকিৎসাৰ ক্ষেত্ৰত সুফলদায়ক বুলি বিবেচিত হৈছে।
