গোলাঘাট জিলাৰ শালমৰা চাহ বাগিচাত বৃহস্পতিবাৰে নিশা বিষাক্ত চুলাই মদ পান কৰি বৰ্তমানলৈকে প্ৰায় ৯৯ জন চাহ শ্ৰমিকে মৃত্যুক সাবটি লোৱা ঘটনাৰ পাছতেই আজি ৰাজীৱ ভৱনত এক সংবাদমেলযোগে মুখ্য মন্ত্ৰী সৰ্বানন্দ সোণোৱাল আৰু আবকাৰী বিভাগৰ মন্ত্ৰী পৰিমল শুক্লবৈদ্যৰ পদত্যাগৰ দাবী তোলে প্ৰদেশ কংগ্ৰেছৰ সভাপতি ৰিপুন বৰাই।
‘আবকাৰী বিভাগৰ এয়া চৰম বিফলতা। নৈতিক দায়িত্ব স্বীকাৰ কৰি বিভাগীয় মন্ত্ৰী পৰিমল শুক্লবৈদ্যই পদত্যাগ কৰিব লাগে।‘ৰিপুন বৰাই এইদৰে সংবাদমেলত কয়।
তদুপৰি, কেৱল দুজন আবকাৰী বিষয়াক বৰ্খাস্ত কৰিয়েই শুক্লবৈদ্যই দায় সাৰিব বিচাৰিছে বুলিও এক গুৰুত্বপূৰ্ণ মন্তব্য কৰে বৰাই।
আনহাতে, মুখ্য মন্ত্ৰীয়েও পৰিমল শুক্লবৈদ্যৰ বিৰুদ্ধে ৪৮ ঘন্টা পাৰ হৈ যোৱাৰ পাছতো কোনো ব্যৱস্থা গ্ৰহণ নকৰাৰ বাবে মুখ্য মন্ত্ৰীৰো পদত্যাগৰ দাবী তোলে ৰিপুন বৰাই।
স্বাধীনতাৰ পাছত গোলাঘাটত সংঘটিত হোৱাৰ দৰে ঘটনা অসমত কেতিয়াও সংঘটিত হোৱা নাছিল বুলি সংবাদমেলত দাবী কৰে বৰাই। তেওঁ অসমত সুৰা নিষিদ্ধ কৰাৰ বাবেও আহ্বান জনায়।
‘বিষাক্ত সুৰা সেৱন কৰি ইমানসংখ্যক লোক পূৰ্বতে এনেধৰণে মৃত্যুমুখত পৰা নাছিল।‘ ৰিপুন বৰাই এইদৰে কয়।
ইপিনে, বিজেপি চৰকাৰৰ দিনতেই এয়াই প্ৰথম লজ্জাজনক আৰু ঘৃণনীয় ঘটনা সংঘটিত হৈছে বুলি ৰাজ্য চৰকাৰক কটাক্ষ কৰে বৰাই।
তাৎপয্যপূৰ্ণভাৱে, গোলাঘাটৰ শালমৰা চাহবাগিছাত সংঘটিত ঘটনাৰ ন্যায়িক তদন্ত বিচাৰিছে প্ৰদেশ কংগ্ৰেছে। মুখ্য মন্ত্ৰীয়ে আজি ঘোষণা কৰা তদন্ত গতানুগতিক আখ্যা দিছে প্ৰদেশ কংগ্ৰেছৰ সভাপতিগৰাকীয়ে।
ইপিনে, গোলাঘাট জিলাত সংঘটিত এনে মৰ্মান্তিক ঘটনাৰ সময়তে বিজেপিৰ মন্ত্ৰী- বিধায়ক ডিব্ৰুগড়ত চলি থকা ‘কাচা-সোণা’ উৎসৱত ব্যস্ত হৈ থকা কথাটো চৰম দুৰ্ভাগ্যজনক আখ্যা দিয়ে প্ৰদেশ কংগ্ৰেছৰ সভাপতিজনে।
‘এনে এক মৰ্মান্তিক ঘটনাৰ মুহুৰ্তত অনুষ্ঠানৰ কাৰ্য্যসূচী স্থগিত ৰাখিব লাগিছিল বিজেপি চৰকাৰে।‘ এইদৰে সংবাদমেলত বৰাই কয়।
আনহাতে, বিষাক্ত সুৰা সেৱন কৰি মৃত্যুক সাবটি লোৱাসকল বিজেপিৰ চাহ জনগোষ্ঠীয় সাংসদ কামাখ্যা প্ৰসাদ তাছা, ৰামেশ্বৰ তেলী আৰু অন্যান্য নেতাসকলৰ ভাতৃ-ভগ্নী নহয় নেকি? বুলি প্ৰশ্ন কৰি বৰাই লগতে তেওঁলোকে বৰ্তমানলৈকে তেওঁলোকৰ খবৰ ল’বলৈ যোৱা নাই কিয়? বুলিও প্ৰশ্ন কৰে।
অৱশ্যে, প্ৰাক্তন কংগ্ৰেছী মন্ত্ৰী ৰকিবুল হুছেইন, সাংসদ গৌৰব গগৈ, মৰিয়নিৰ বিধায়ক ৰূপজ্যোতি কুৰ্মী, অজন্তা নেওগ আৰু বিস্মিতা গগৈকে ধৰি অন্য বহুকেইজন নেতাই আজি পুৱা মৃতকৰ পৰিয়ালৰ কাষত উপস্থিত হৈ সমবেদনা জ্ঞাপন কৰে বুলি সংবাদমেলত বৰাই সদৰী কৰে।
ইপিনে, খুমটাই সমষ্টিৰ বিধায়ক মৃণাল শইকীয়াই চাহ বাগিছা অধ্যুষিত অঞ্চলত বিজেপিৰ জনপ্ৰিয়তা বৃদ্ধি হোৱা হেতুকে এই ঘটনা বিৰোধীয়ে সংঘটিত কৰা বুলি অভিযোগ আনিছিল। শইকীয়াৰ এই অভিযোগ সম্পূৰ্ণ ভিত্তিহীন আৰু গৰিহনাৰ যোগ্য বুলি সংবাদমেলত উল্লেখ কৰে ৰিপুন বৰাই।
‘বিধায়ক মৃণাল শইকীয়াই ২৪ ঘন্টাৰ ভিতৰত বিৰোধীৰ বিৰুদ্ধে অনা তথ্য ৰাজহুৱা কৰক অনথ্যা ৰাজহুৱা জীৱন ত্যাগ কৰক।‘ শইকীয়াৰ প্ৰতি সংবাদমেলত এই প্ৰত্যাহ্বান প্ৰদেশ কংগ্ৰেছৰ সভাপতি ৰিপুন বৰাৰ।
