অসমত বিজেপিৰ গণ সম্পর্ক বিচ্ছিন্ন হৈছে,যাৰ বাবে তেওঁলোকে আকৌ জনসম্পৰ্ক কৰিব লগা হৈছে।
২১’ত সকলো অসমবাসীয়ে বিজেপিক প্ৰত্যুত্তৰ দিয়াৰ আহ্বান জনাই অসম প্ৰদেশ কংগ্ৰেছৰ সভাপতি ৰিপুন বৰাই এইদৰে কয় ৷
পেট্ৰল-ডিজেলৰ মূল্যবৃদ্ধিৰ বিৰুদ্ধে আজি ৰাজীৱ ভৱনত অসম প্ৰদেশ কংগ্ৰেছে অৱস্থান ধৰ্মঘট পালন কৰে ৷
প্ৰতিবাদী কাৰ্যসূচীত উপস্থিত থাকি বৰাই কয়, “লকডাউনে ৰাইজক জুৰুলা কৰিছে। তাৰ পিছত কেৱল মাত্ৰ ৰাজহ সংগ্ৰহৰ লক্ষ্যৰে অন্যায়ভাৱে বিজেপি চৰকাৰে বৃদ্ধি কৰিছে পেট্ৰল-ডিজেলৰ মূল্য” ৷
“কংগ্ৰেছ চৰকাৰৰ দিনত আন্তৰ্জাতিক বজাৰত খাৰুৱা তেলৰ মূল্য প্ৰতি বেৰেলত আছিল ১০৮ ডলাৰ।বৰ্তমান ইয়াৰ মূল্য হৈছে ৪০ ডলাৰ।তাৰ পিছতো আজি পেট্ৰল-ডিজেলৰ মূল্য হ্ৰাস হোৱাৰ বিপৰীতে বৃদ্ধিহে হৈছে। দেশ চলাবলৈ অন্য উৎসসমূহৰ পৰা ৰাজহ সংগ্ৰহ কৰিব নোৱাৰা বিজেপিয়ে বৰ্তমানলৈ ১২বাৰকৈ কৰ বৃদ্ধি কৰিছে পেট্ৰল-ডিজেলত,”-বৰাই কয়
ইপিনে, লকডাউন, কণ্টেইমেন্ট জ’ন, কোৱাৰেণ্টাইনক বিৰোধীৰ বিৰুদ্ধে প্ৰতিশোধৰ আহিলা হিচাপে বিজেপিয়ে ব্যৱহাৰ কৰিছে বুলি অভিযোগ উত্থাপন কৰি বৰাই কয়, “আমাৰ মানুহে কোৱাৰেণ্টাইন কৰিব লাগে কিন্তু তেওঁলোকৰ মানুহ দিল্লী পৰা আহিলে কোৱাৰেণ্টাইন নকৰিলেও হয়”৷
আনহাতে, প্ৰতিবাদস্থলীত প্ৰাক্তন মুখ্যমন্ত্ৰী তৰুণ গগৈয়ে কয়, “লকডাউনৰ ফলত জনসাধৰণক সকাহ দিয়াৰ পৰিবৰ্তে যি ৰামটাঙোন শোধাইছে সেয়াই আজি প্ৰমানিত কৰিছে মোডী দুখীয়া দৰিদ্ৰৰ বন্ধু নহয়, ধনীৰহে বন্ধু”৷
বস্তুৰ দাম বৃদ্ধিতো বিজেপি চৰকাৰ বিফল হৈছে বুলি সমালোচনা কৰে গগৈয়ে ৷
কংগ্ৰেছে কাৰ্টুনৰ জৰিয়তে বিজেপিৰ কামৰ সমালোচনা কৰাৰ লগতে কটাক্ষ কৰে৷ ঘোঁৰা গাড়ীত মূল্যবৃদ্ধি নিয়ন্ত্ৰণত ব্যৰ্থ প্ৰধানমন্ত্ৰী নৰেন্দ্ৰ মোদীৰ কাৰ্টুন তুলি সাব্যস্ত কৰে প্ৰতিবাদী কাৰ্য্যসূচী ৷
ৰাজীৱ ভৱনত অনুষ্ঠিত প্ৰতিবাদী কাৰ্যসূচীত ৰকিবুল হুছেইন, ৰেকিবুদ্দিন আহমেদৰ লগতে উপস্থিত থাকে দলটোৰ বহুকেইজন জ্যেষ্ঠ নেতা তথা বিধায়ক।
