গোষ্ঠীসংঘৰ্ষই জুৰুলা কৰা মণিপুৰলৈ এতিয়াও ঘূৰি অহা নাই শান্তি। যোৱা মে’ মাহৰ পৰাই উপত্যকাটোত চলি থকা হিংসাত্মক কাৰ্যকলাপৰ পৰিণতিত ৰাজ্যখনত আইন-শৃংখলা পৰিস্থিতিৰ ব্যাপক স্খলন ঘটিছে।
এনে পৰিস্থিতিৰ মাজতে ৰাজ্যখনৰ উখৰুল জিলাত বৃহস্পতিবাৰে সন্ধিয়া প্ৰায় ১০ জন অচিনাক্ত অস্ত্ৰধাৰী লোকৰ এটা দলে পঞ্জাৱ নেশ্যনেল বেংকৰ পৰা ১৮.৮৫ কোটি টকা লুটপাত কৰিছে।
যোৱা ৩ মে’ৰ পৰা চলি মণিপুৰত চলি থকা জনগোষ্ঠীয় সংঘৰ্ষৰ সময়ত এয়া ৰাজ্যখনত তৃতীয়টো বেংক লুটপাতৰ ঘটনা। আৰক্ষীয়ে জানিবলৈ দিয়া মতে, বেংকৰ মেনেজাৰ আৰু কৰ্মচাৰীয়ে দিনটোৰ বাবে লেনদেন আৰু জমা কাম শেষ কৰিছিল।
কিন্তু ঘটনা সংঘটিত হোৱাৰ সময়ত মূল গেটৰ শ্বাটাৰ বন্ধ কৰি ভিতৰত কাম কৰি আছিল। হঠাতে দহজন অস্ত্ৰধাৰী লোক কেৱল বেংকৰ কৰ্মচাৰীয়ে ব্যৱহাৰ কৰা প্ৰৱেশদ্বাৰেৰে সোমাই আহে।
ভিতৰত প্ৰৱেশ কৰি অস্ত্ৰধাৰী দলটোৱে ষ্ট্ৰং ৰুমৰ ওচৰত কৰ্তব্যৰত মেনেজাৰ আৰু এজন নিৰাপত্তাৰক্ষীক আগুৰি ধৰে আৰু ইয়াৰ পিছতে বেংকৰ পৰা ১৮.৮৫ কোটি টকা লুট কৰি ঘটনাস্থলীৰ পৰা আঁতৰি যায়।
এই সমগ্ৰ ঘটনা বেংকৰ ভিতৰত স্থাপন কৰা চিচিটিভি কেমেৰাত ধৰা পৰে। চিচিটিভি ফুটেজত এ কে ছিৰিজৰ ৰাইফলকে ধৰি বিভিন্ন ধৰণৰ অস্ত্ৰৰে সজ্জিত দলটো দেখিবলৈ পোৱা গৈছে।
দলটোৱে খাকী ইউনিফৰ্ম আৰু ট্ৰেকছুট পৰিধান কৰা বুলি চিচিটিভি ফুটেজৰ আধাৰত আৰক্ষীয়ে প্ৰকাশ কৰিছে। বেংকৰ ভাৰপ্ৰাপ্ত মেনেজাৰগৰাকীয়ে জানিবলৈ দিয়া মতে, বেংকত মুঠ আঠজন নিৰাপত্তা কৰ্মী নিযুক্তি দিয়া হৈছে।
অৱশ্যে ডকাইতি সংঘটিত হোৱাৰ সময়ত সকলো নিৰাপত্তাৰক্ষী বেংকত উপস্থিত নাছিল। ঘটনা সন্দৰ্ভত আৰক্ষীয়ে এটা গোচৰ ৰুজু কৰিছে আৰু বেংকৰ সকলো কৰ্মচাৰী আৰু নিৰাপত্তাৰক্ষীক জেৰা কৰিছে।
