ওৰাং ৰাষ্ট্ৰীয় উদ্যান তথা ব্যাঘ্ৰ প্ৰকল্পত গঁড় চিকাৰৰ প্ৰচেষ্টাৰে অনা বুলি সন্দেহ কৰা কিছু অত্যাধুনিক অস্ত্ৰ-শস্ত্ৰ উদ্ধাৰ কৰা হৈছে।
দৰং জিলাৰ দলগাওঁ আৰক্ষী থানাৰ বিষয়াসকলে এটা ৩০৩ ৰাইফল, ১১জাই সজীৱ গুলী, এটা ছাইলেন্সাৰকে ধৰি অস্ত্ৰ-শস্ত্ৰখিনি ৰাষ্ট্ৰীয় উদ্যানখনৰ কাষতে থকা সোণাৰি গাঁৱৰ ছমছেৰ আলীৰ ঘৰৰ পিছপিনৰ পৰা উদ্ধাৰ কৰে।
‘’সোণাৰি গাঁৱত আমি কিছু অস্ত্ৰ-শস্ত্ৰ থকাৰ তথ্য লাভ কৰিছিলো। সেই অনুসৰি আমি অঞ্চলটোত তালাচী চলাই এটা ৩০৩ ৰাইফল, ১১জাই সজীৱ গুলী, এটা ছাইলেন্সাৰকে ধৰি মাটিৰ তলত লুকাই ৰখা এটা বেগ ছমছেৰ আলী নামৰ লোকজনৰ ঘৰৰ পৰা উদ্ধাৰ কৰো,’’-দলগাওঁ আৰক্ষী থানাৰ ভাৰপ্ৰাপ্ত বিষয়া ক্ষীৰোদ বৈশ্যই কয়।
অস্তৰ-শস্ত্ৰখিনি ওৰাং ৰাষ্ট্ৰীয় উদ্যান তথা ব্যাঘ্ৰ প্ৰকল্পত গঁড় চিকাৰৰ বাবে অনা হৈছিল বুলি আৰক্ষীয়ে সন্দেহ কৰিছে।
‘’আমি সন্দেহ কৰিছো যে একাংশ সমাজ বিৰোধী শক্তিয়ে গঁড় চিকাৰৰ উদ্দেশ্যে এই অস্ত্ৰ-শস্ত্ৰৰে সৈতে বনাঞ্চলত প্ৰৱেশৰ সুযোগ বিচাৰি আছিল,’’- দলগাওঁ আৰক্ষী থানাৰ ভাৰপ্ৰাপ্ত বিষয়া ক্ষীৰোদ বৈশ্যই কয়।
ইপিনে, আৰক্ষীয়ে ইতিমধ্যে এই ঘটনাৰ তদন্ত আৰম্ভ কৰিছে।
আনহাতে, এই বাতৰি লিখাৰ পৰলৈকে এই অস্ত্ৰ-শস্ত্ৰ উদ্ধাৰৰ ঘটনাৰ সৈতে জড়িত কোনো লোকক আৰক্ষীয়ে গৰেপ্তাৰ কৰা নাই।
