ভাৰতীয় সেনাৰ অৱসৰপ্ৰাপ্ত জেনেৰেল মনোজ মুকুন্দ নৰৱনে মণিপুৰত সংঘটিত হোৱা ধাৰাবাহিক হিংসাত্মক ঘটনাৰ আঁৰত চীন আছে বুলি অভিযোগ উত্থাপন কৰিছে।
প্রাক্তন সেনাধ্যক্ষগৰাকীয়ে কয়, ‘উত্তৰ-পূর্বাঞ্চলৰ বিভিন্ন উগ্রপন্থী সংগঠনক চীনে অবিৰতভাৱে সমর্থন কৰি আহিছে৷ শেহতীয়াকৈ মণিপুৰত সংঘটিত হিংসাত্মক পৰিস্থিতিৰ পটভূমিতো চীনৰ সমৰ্থনৰ অভিযোগ নুই কৰিব নোৱাৰি।”
যোৱা তিনিমাহ ধৰি মণিপুৰত চলি থকা ধাৰাবাহিক হিংসাত্মক পৰিস্থিতিয়ে ৰাষ্ট্ৰীয় নিৰাপত্তাৰ প্ৰতি ভাবুকিৰ সৃষ্টি কৰিছে বুলি নৰবানে কয়।
একে সময়তে তেওঁ মন্তব্য কৰি কয় যে উত্তৰ-পূব অঞ্চলত অশান্তিৰ সৃষ্টি কৰাত চীনৰ ভূমিকা সম্পৰ্কে চৰকাৰে অৱগত। এই সন্দৰ্ভত সংশ্লিষ্ট বিষয়াসকলে প্ৰয়োজনীয় পদক্ষেপ গ্ৰহণ কৰিছে।’
উত্তৰ-পূবৰ লগতে পূব লাডাখতো চীনা সেনাই প্ৰকৃত নিয়ন্ত্ৰণ ৰেখা (এল এ চি) অস্থিৰ কৰি তোলাৰ ক্ষেত্ৰতো সক্ৰিয় হৈ আছে বুলিও অভিযোগ কৰে।
প্ৰসংগক্ৰমে, কেইবা দশক ধৰি অসম, নাগালেণ্ড, মণিপুৰকে ধৰি উত্তৰ-পূব ভাৰতৰ বিভিন্ন ৰাজ্যৰ সক্ৰিয় উগ্ৰপন্থীয়ে ম্যানমাৰত শিবিৰ স্থাপন কৰি কাৰ্যকলাপ চলাই আহিছে। অভিযোগ উত্থাপন হৈছে যে চীনৰ চোৰাংচোৱা সংস্থাটোই উত্তৰ-পূব অঞ্চলৰ উগ্ৰপন্থীসকলক অস্ত্ৰ আৰু আন্তঃগাঁথনিৰ ক্ষেত্ৰত সহায় অবিৰতভাৱে আগবঢ়াই আহিছে।
চোৰাংচোৱা সূত্ৰ অনুসৰি চীন সমৰ্থিত উগ্ৰপন্থী সংগঠনৰ তালিকাত কুকি নেচনেল আৰ্মী, কুকি নেচনেল ফ্ৰন্ট, ইউনাইটেড কুকি লিবাৰেচন ফ্ৰণ্টৰ নাম অন্তৰ্ভুক্ত।
