ডিমা হাছাও জিলাৰ উমৰাংছুত সংঘটিত শোকাৱহ কয়লাখনি দুৰ্ঘটনাৰ তদন্তৰ বাবে অসম চৰকাৰে এজনীয়া তদন্ত সমিতি গঠন কৰিছে। গুৱাহাটী উচ্চ ন্যায়ালয়ৰ প্ৰাক্তন ন্যায়াধীশ অনিমা হাজৰিকাৰ নেতৃত্বত গঠিত এই সমিতিয়ে দুৰ্ঘটনাটোৰ কাৰণ অনুসন্ধান কৰিব আৰু দায়ী ব্যক্তি বা সংগঠন চিনাক্ত কৰিব।
উমৰাংছুৰ কয়লাখনিত হোৱা এই দুৰ্ঘটনাত বহু শ্ৰমিক আৱদ্ধ হৈ পৰিছিল। বহু প্ৰচেষ্টাৰ পিছত চাৰিজন শ্ৰমিকৰ মৃতদেহ উদ্ধাৰ কৰা হৈছিল, কিন্তু কেবাজনো শ্ৰমিকৰ এতিয়াও কোনো সন্ধান পোৱা নাই। এই ঘটনাৰ পাছত অবৈধ কয়লা খননৰ বিষয়ে ৰাজ্যজুৰি ব্যাপক চৰ্চা লাভ কৰিছিল।
২০২৫ চনৰ ২৪ জানুৱাৰীত ৰাজনৈতিক (ক) বিভাগে জাৰি কৰা অধিসূচনা অনুসৰি, এই সমিতিৰ কাম হ’ব ঘটনাৰ তথ্য আৰু কাৰণ নিৰ্ণয় কৰা, অবৈধ কয়লা খননৰ বাবে দায়ী ব্যক্তি বা সংগঠন চিনাক্ত কৰা, কৰ্তৃপক্ষৰ কোনো হেমাহি হ’লে তাৰ দায়িত্ব নিৰ্ধাৰণ কৰা আৰু ভৱিষ্যতে এনে ঘটনা ৰোধৰ বাবে পৰামৰ্শ দিয়া।
এই তদন্ত সমিতিয়ে ২০২৫ চনৰ ৯ আৰু ১১ ছেপ্টেম্বৰত পুৱা ১০:৩০ বজাৰ পৰা বিয়লি ৪:০০ বজালৈ গুৱাহাটীৰ খানাপাৰাস্থিত অসম প্ৰশাসনিক কৰ্মচাৰী মহাবিদ্যালয়ৰ ২১২ নং কোঠাত ৰাজহুৱা শুনানি অনুষ্ঠিত কৰিব। ভুক্তভোগীৰ পৰিয়ালৰ সদস্য, ব্যক্তি, সংগঠন বা এই ঘটনা সম্পৰ্কে তথ্য থকা যিকোনো ব্যক্তিক মৌখিক বা বস্তুগত প্ৰমাণ দাখিল কৰিবলৈ আমন্ত্ৰণ জনোৱা হৈছে। সমিতিৰ সচিব কুলেন শৰ্মাৰ দ্বাৰা ৰাজহুৱা জাননী জাৰি কৰি তদন্তত অংশগ্ৰহণৰ আহ্বান জনোৱা হৈছে।
উল্লেখ্য, ডিমা হাছাও জিলাত অবৈধ কয়লা খননৰ অভিযোগ বহু পুৰণি। আইনী নিষেধাজ্ঞাৰ পিছতো এই অবৈধ কাৰ্যকলাপ চলি থকাৰ কথা উমৰাংছুৰ ঘটনাৰ পাছতে পোহৰলৈ আহিছে। এই ঘটনাত উত্তৰ কাছাৰ স্বায়ত্তশাসিত পৰিষদৰ মুখ্য কাৰ্যবাহী দেৱলাল গাৰ্লোচাৰ পত্নী কণিকা হোজাইৰ নাম জড়িত হৈছিল। ৰাজনৈতিক পৃষ্ঠপোষকতাৰে এটা চক্ৰই এই খনন চলাই থকাৰ অভিযোগ উত্থাপিত হৈছিল।
