বন্য হাতীৰ গচকত গুৱাহাটীত প্ৰাণ হেৰুৱাইছে ভাৰতীয় সেনাৰ এগৰাকী জোৱানে গুৱাহাটীৰ নাৰেংগীস্থিত সেনা চাউনীত এই ঘটনা সংঘটিত হৈছে। নিহত জোৱান গৰাকীক খামলিয়ং খাপ বুলি চিনাক্ত কৰা হৈছে।
শনিবাৰে সন্ধিয়া চাউনীৰ ভিতৰত কৰ্তব্যৰত অৱস্থাত জোৱানগৰাকী।ডিমাপুৰৰ বাসিন্দা খাপ ২২২ এডভান্সড বেছ অৰ্ডানেন্স ডিপো (এবিঅ’ডি)ৰ সৈতে জড়িত আছিল বুলি এগৰাকী বিষয়াই জানিবলৈ দিছে।
হাতীৰ আক্ৰমণত গুৰুতৰভাৱে আহত জোৱানগৰাকীক লগে লগে বশিষ্টস্থিত আৰ্মি বেছ হাস্পতাললৈ প্ৰেৰণ কৰা হয়। অৱশ্যে আঘাত গুৰুতৰ হোৱাৰ ফলস্বৰূপে চিকিৎসাধীন অৱস্থাতে জোৱানগৰাকীৰ মৃত্যু হয়।
উল্লেখ্য যে, নাৰেংগীৰ সেনা চাউনী আমচাং বন্যপ্ৰাণী অভয়াৰণ্যৰ কাষতে অৱস্থিত। কেণ্টনমেণ্ট এলেকাৰ মাজেৰেই পাৰ হৈ গৈছে হাতী কৰিডৰ। সেয়ে কেণ্টনমেণ্ট অঞ্চলত বনৰীয়া হাতীৰ বিচৰণৰ দৃশ্য এটা সাধাৰণ দৃশ্য।
খাদ্যৰ সন্ধানত প্ৰায়ে আমচাং বন্যপ্ৰাণী অভয়াৰণ্যৰ পৰা ওলাই আহে বন্য হাতীৰ জাক। বিগত ২০১৯ চনৰ নৱেম্বৰ মাহত খাদ্যৰ সন্ধানত কেণ্টনমেণ্টৰ এখন কেণ্টিনত প্ৰৱেশ কৰিছিল বনৰীয়া হাতী।
যোৱা বৰ্ষৰ অক্টোবৰ মাহত ছ’চিয়েল মিডিয়াত ভাইৰেল হোৱা এটা ভিডিঅ’ত কেণ্টনমেণ্টৰ শিশুৰ খেলপথাৰত প্ৰৱেশ কৰি এটা বন্য হস্তীয়ে কেণ্টনমেণ্টৰ শিশুৰ খেল উপভোগ কৰাৰ দৃশ্য দেখিবলৈ পোৱা গৈছিল।
