ঘোষণা হ’ল ২০২৫ ৰ চিবিএছই দ্বাদশ শ্ৰেণীৰ ফলাফল: ৮৮.৩৯% উত্তীৰ্ণৰ হাৰ, ল’ৰাক পুনৰ অতিক্ৰম কৰিলে ছোৱালীয়ে

কেন্দ্ৰীয় মাধ্যমিক শিক্ষা ব’ৰ্ড চমুকৈ চিবিএছইৰ আজি, ১৩ মে’ দ্বাদশ শ্ৰেণীৰ ব’ৰ্ড পৰীক্ষাৰ ফলাফল ঘোষণা কৰিছে। ইতিমোধ্যে এই ফলাফল অফিচিয়েল ৱেবছাইট cbse.gov.in, results.cbse.nic.in, আৰু results.digilocker.gov.in ত উপলব্ধ। ইয়াৰ উপৰিও ছাত্ৰ-ছাত্ৰীসকলে UMANG এপৰ জৰিয়তে নিজৰ ফলাফল পৰীক্ষা কৰিব পাৰিব। একে দিনই দশম শ্ৰেণীৰো ফলাফল ঘোষণা কৰিব চিবিএছইত্ৰ

উল্লেখ্য যে ২০২৫ বৰ্ষত চিবিএছইত্ৰ দ্বাদশ শ্ৰেণীৰ পৰীক্ষাত মুঠ ১৭,০৪,৩৬৭ জন পৰীক্ষাৰ্থীয়ে পঞ্জীয়ন কৰিছিল, যাৰে ১৬,৯২,৭৯৪ জনে পৰীক্ষাত অৱতীৰ্ণ হৈছিল। ইয়াৰে ১৪,৯৬,৩০৭ জন ছাত্ৰ-ছাত্ৰীয়ে পৰীক্ষাত সফলতাৰে উত্তীৰ্ণ হৈছে। উত্তীৰ্ণৰ হাৰ হৈছে ৮৮.৩৯%। ২০২৪ চনৰ ৮৭.৯৮% উত্তীৰ্ণৰ হাৰৰ তুলনাত এইবছৰ ০.৪১% উত্তীৰ্ণৰ হাৰ বৃদ্ধি হৈছে।

এই বছৰ চিবিএছই দ্বাদশ শ্ৰেণীৰ পৰীক্ষাত ১৯,২৯৯ খন বিদ্যালয়ে অংশগ্ৰহণ কৰিছিল, যিটো ২০২৪ চনৰ ১৮,৪১৭ খন বিদ্যালয়ৰ তুলনাত যথেষ্ট বৃদ্ধি। একেদৰে, পৰীক্ষা কেন্দ্ৰৰ সংখ্যাও ২০২৪ চনৰ ৭,১২৬ৰ পৰা ২০২৫ চনত ৭,৩৩০ লৈ বৃদ্ধি পাইছে। এই সম্প্ৰসাৰণে চিবিএছইৰ শিক্ষা ব্যৱস্থাৰ ব্যাপক প্ৰভাৱৰ ইংগিত বহন কৰিছে।

ইফালে চিবিএছইৰ বিভিন্ন অঞ্চলৰ ভিতৰত বিজয়াৱাড়াই ৯৯.৬০% উত্তীৰ্ণৰ হাৰৰ সৈতে শীৰ্ষ স্থান লাভ কৰিছে। ত্ৰিবেন্দ্ৰমে ৯৯.৩২%, চেন্নাইয়ে ৯৭.৩৯%, বেংগালুৰুৱে ৯৫.৯৫%, আৰু দিল্লী পশ্চিমে ৯৫.৩৭% উত্তীৰ্ণৰ হাৰ লাভ কৰিছে।

 ২০২৫ চনৰ ফলাফলত ছোৱালীয়ে পুনৰবাৰ ল’ৰাৰ তুলনাত উৎকৃষ্ট প্ৰদৰ্শন দেখুৱবলৈ সক্ষম হৈছে। ছোৱালীৰ উত্তীৰ্ণৰ হাৰ ৯১.৬৪% হোৱাৰ বিপৰীতে ল’ৰাৰ উত্তীৰ্ণৰ হাৰ ৮৫.৭০%। এই ৫.৯৪% ব্যৱধানে পূৰ্বৰ বছৰৰ ধাৰা অব্যাহত ৰাখিছে, য’ত ২০২৪ চনত ছোৱালীৰ উত্তীৰ্ণৰ হাৰ ৯১.৫২% আৰু ল’ৰাৰ ৮৫.১২% আছিল। ট্ৰেন্সজেণ্ডাৰ ছাত্ৰ-ছাত্ৰীসকলে ১০০% উত্তীৰ্ণৰ হাৰ লাভ কৰি অসাধাৰণ প্ৰদৰ্শন কৰিছে,

আনহাতে বিদ্যালয়সমূহৰ ভিতৰত জৱাহৰ নৱোদয় বিদ্যালয়সমূহে ৯৯.২৯% উত্তীৰ্ণৰ হাৰৰ সৈতে শীৰ্ষ স্থান দখল কৰিছে। কেন্দ্ৰীয় বিদ্যালয়সমূহে ৯৯.০৫% আৰু কেন্দ্ৰীয় তিব্বতী বিদ্যালয়সমূহে ৯৮.৯৬% উত্তীৰ্ণৰ হাৰ লাভ কৰিছে। চৰকাৰী সাহায্যপ্ৰাপ্ত বিদ্যালয়ৰ উত্তীৰ্ণৰ হাৰ ৯১.৫৭% আৰু চৰকাৰী বিদ্যালয়ৰ ৯০.৪৮%। ব্যক্তিগত বিদ্যালয়সমূহে ৮৭.৯৪% উত্তীৰ্ণৰ হাৰ লাভ কৰিছে।

২০২৫ চনত চিবিএছইৰ ১,১১,৫৪৪ জন ছাত্ৰ-ছাত্ৰীয়ে ৯০%ৰ ওপৰত নম্বৰ লাভ কৰিছে, যিটো মুঠ উত্তীৰ্ণ ছাত্ৰ-ছাত্ৰীৰ ৬.৫৯%। আনহাতে, ২৪,৮৬৭ জন ছাত্ৰ-ছাত্ৰীয়ে ৯৫%ৰ ওপৰত নম্বৰ লাভ কৰিছে, যিটো মুঠ ছাত্ৰ-ছাত্ৰীৰ ১.৪৭%।

ইফালে এই বছৰ ১,২৯,০৯৫ জন ছাত্ৰ-ছাত্ৰীক কম্পাৰ্টমেণ্ট শিতানত ৰখা হৈছে, যিটো মুঠ পৰীক্ষাৰ্থীৰ ৭.৬৩%। ২০২৪ চনৰ ১,২২,১৭০ জন (৭.৫৪%)ৰ তুলনাত এই সংখ্যা কিছু বৃদ্ধি পাইছে। কম্পাৰ্টমেণ্ট পৰীক্ষা জুলাই মাহত অনুষ্ঠিত হ’ব।

ফলাফল ঘোষণাৰ পিছতে চিবিএছইয়ে নম্বৰ পৰীক্ষণ আৰু পুনৰ মূল্যায়নৰ বাবে আবেদনৰ সুবিধা মুকলি কৰিব। এটা বা দুটা বিষয়ত ব্যৰ্থ হোৱা ছাত্ৰ-ছাত্ৰীসকলে কম্পাৰ্টমেণ্ট পৰীক্ষাত অৱতীৰ্ণ হ’ব পাৰিব, কিন্তু দুটাতকৈ অধিক বিষয়ত ব্যৰ্থ হ’লে পৰৱৰ্তী শিক্ষাবৰ্ষত পুনৰ পৰীক্ষা দিবলগীয়া হ’ব। এই সন্দৰ্ভত বিশদ নিৰ্দেশনা চিবিএছইৰ অফিচিয়েল ৱেবছাইটত প্ৰকাশ কৰা হ’ব।