মদ এৰি কাপোৰৰ ব্যৱসায়ত ধৰিলে নেকি শ্বাহৰুখ পুত্ৰ আৰিয়ান খানে?
বিতৰ্ক আৰু চৰ্চাত থকা বলিউডৰ ছুপাৰষ্টাৰ শ্বাহৰুখ খানৰ পুত্ৰ আৰিয়ান খানে যোৱা বছৰ আৰম্ভ কৰিছিল সুৰাৰ ব্যৱসায়। কিন্তু এইবাৰ নতুনকৈ আৰম্ভ কৰিছে কাপোৰৰ ব্যৱসায়।
সোমবাৰে তেওঁ নিজৰ কাপোৰৰ ব্ৰেণ্ডৰ এটা ল’গ শ্বেয়াৰ কৰে। ডি’য়াভল নামৰ ব্ৰেণ্ডটোৱে নিজকে ‘লাক্সাৰী ষ্ট্ৰীটৱেৰ’ ব্ৰেণ্ড হিচাপে ঘোষণা কৰিছে। জানিব পৰা মতে পুত্ৰৰ এই ব্ৰেণ্ডটোৰ বিজ্ঞাপনত মডেল হিচাপে থাকিব পিতৃ শ্বাহৰুখ খান নিজেই।
উল্লেখ্য যে ২০২১ চনত ড্ৰাগছৰ এটি গোচৰৰ অভিযুক্ত আছিল আৰিয়ান খান। সেই সময়ত ১ মাহ সময় কাৰাবাস খাটিছিল ছুপাৰষ্টাৰ শ্বাহৰুখ খানৰ পুত্ৰ আৰিয়ান খানে। ড্ৰাগছৰ গোচৰত কাৰাবাস খাটি সেই সময়ত দেশবাসীৰ উপহাসৰ পাত্ৰ হৈ পৰিছিল আৰিয়ান।
কিন্তু পিছত এন চি বিয়ে আৰিয়ানক ড্ৰাগছৰ গোচৰৰ পৰা মুক্ত কৰে। উপযুক্ত প্ৰমাণৰ অভাৱত এনচিবিয়ে তেওঁক দোষমুক্ত কৰে। সেই সময়ত তেওঁ নিজকে কেইবামাহো গৃহবন্দী কৰি ৰাখিছিল। লগতে ছ’চিয়েল মিডিয়াৰ পৰাও অব্যাহতি লৈছিল আৰিয়ানে।
যোৱা বছৰ ভগ্নী সুহানাৰ সৈতে আই পি এলৰ নিলামত অংশ লৈছিল আৰিয়ানে। ইয়াৰ পিছতে তেওঁ প্ৰিমিয়াম ভ’ডকাৰ ব্ৰেণ্ড মুকলি কৰাৰ কথা ঘোষণা কৰিছিল।
ইয়াৰ লগতে আৰিয়ানে ঘোষণা কৰিছে যে তেওঁ পিতৃৰ দৰে পৰ্দাৰ সমুখত অভিনেতা হিচাপে কাম নকৰে। আৰিয়ানে কাম কৰিব পৰিচালক হিচাপে। তেওঁ হয়তো অতি সোনকালেই নেটফ্লিক্সৰ বাবে এখন চিনেমা নিৰ্মাণ কৰিব।