Malnutrition in India দেশৰ ৩৩লাখতকৈয়ো অধিক শিশু পুষ্টিহীনতাত ভূগিছে। কেন্দ্ৰীয় চৰকাৰৰ মহিলা আৰু শিশু উন্নয়ন মন্ত্ৰ্যালয়ে তথ্য জনাৰ অধিকাৰ আইনৰ আবেদনৰ উত্তৰত দিছে এনে তথ্য। ইয়াৰ ভিতৰত আধাতকৈয়ো অধিক সংখ্যক চৰম পুষ্টিহীনতাৰ শ্ৰেণীত পৰিছে।
কেন্দ্ৰীয় চৰকাৰৰ তথ্য মতে এই তালিকাৰ শীৰ্ষত আছে মহাৰাষ্ট্ৰ, বিহাৰ আৰু গুজৰাট।
বিগত প্ৰায় ডেৰ বছৰ ধৰি চলি থকা কৰ’না পৰিস্থিতিয়ে উদ্বেগজনক ছবি দাঙি ধৰিছে। মন্ত্ৰ্যালয়ৰ ফালৰ পৰাও আশংকা প্ৰকাশ কৰা হৈছে যে অতিমাৰীত দৰিদ্ৰ শ্ৰেণীৰ মাজত স্বাস্থ্য তথা পুষ্টিৰ অভাৱ আৰু বৃদ্ধি পাব পাৰে।
মন্ত্ৰ্যালয়ে প্ৰকাশ কৰা তথ্য অনুসৰি, যোৱা ১৪ অক্টোবৰলৈকে চৰম পুষ্টিহীনতাৰ বলি হৈছে প্ৰায় ১৭লাখ ৭৬হাজাৰ ৯০২ টি শিশু। সেইদৰে মধ্যমীয়া তীব্ৰ পুষ্টিহীনতাত ভূগিছে প্ৰায় ১৫লাখ ৪৬হাজাৰ ৪২০টি শিশু।
কেন্দ্ৰৰ তথ্য মতে সকলো মিলি ৩৪ খন ৰাজ্য আৰু কেন্দ্ৰশাসিত অঞ্চলত এই সংখ্যা হৈছে ৩৩লাখ ২৩ হাজাৰ ৩২২টি শিশু।
স্বাভাৱিকতে এই তথ্যই দেশৰ এক ভয়ংকৰ ছবি দাঙি ধৰিছে। যোৱা নৱেম্বৰৰ তুলনাত চৰম পুষ্টিহীনতাত ভোগাৰ সংখ্যা প্ৰায় ৯১শতাংশ বৃদ্ধি পাইছে।
যোৱা বছৰৰ ৯লাখ ২৭হাজাৰ ৬০৬জনৰ বিপৰীতে এই বছৰ সেয়া ১৭লাখ অতিক্ৰম কৰিছে।
আনহাতে, ভাৰতে ইয়াৰ ২০২০ত বিশ্ব ক্ষুধা সূচক (Global Hunger Index) তালিকাত ১১৬খন দেশৰ ভিতৰত থকা ৯৪সংখ্যক স্থানৰ পৰা ২০২১ত ১০১ সংখ্যক স্থানলৈ অৱনমিত হৈছে। এইক্ষেত্ৰত ভাৰতৰ স্থান চুবুৰীয়া পাকিস্তান, বাংলাদেশ আৰু নেপালৰ তলতে।
চাইল্ড ৰাইটছ এণ্ড ইউ নামৰ সংস্থাটোৰ মুখ্য কাৰ্যবাহী পূজা মাৰৱাহাই সংবাদমাধ্যমক জানিবলৈ দিয়ে যে অতিমাৰীৰ ফলত আৰ্থ-সামাজিক দিশত ইমান তীব্ৰ প্ৰভাৱ পৰিছে যে পৰিস্থিতি আৰু অধিক অৱনতি ঘটিছে।
তেওঁ কয় যে স্কুল বন্ধ হৈ থকাৰ বাবে দৰিদ্ৰ শিশুসকলে মিড ডে মিল নোপোৱাৰ ফলত তেওঁলোকৰ খাদ্য সংকট আৰু বৃদ্ধি পাইছে।
Also Read: Covid Update ৰাজ্যত নতুনকৈ কিমান আক্ৰান্ত হ’ল কোভিডত, মৃত্যু কিমানৰ?
ইপিনে, পুষ্টিহীনতাত ভোগা শিশুসকলৰ কৰ’নাত আক্ৰান্ত হোৱাৰ আশংকা বৃদ্ধি পোৱাৰ কথা ব্যক্ত কৰিছে বিশেষজ্ঞ চিকিৎসকে। কিয়নো পুষ্টিহীনতাত ভোগা শিশুসকলৰ শাৰীৰিক ক্ষমতা কম থকাৰ বাবে তেওঁলোকৰ আক্ৰান্ত হোৱাৰ সম্ভাৱনা অধিক থাকে।
বৰ্তমান কেন্দ্ৰীয় চৰকাৰৰ কল্যাণমূলক আঁচনিসমূহে কিয় দৰিদ্ৰ শিশুসকলৰ স্বাস্থ্যৰ দিশটো সামৰি ল’ব পৰা নাই তাক লৈও সচেতন মহলত প্ৰশ্নৰ অৱতাৰণা হৈছে।
