পঞ্জশিৰত উভতি ধৰিছে তালিবানক; মাছুদ বাহিনীৰ প্ৰত্যাক্ৰমণত নিহত ৭০০ তালিবান জেহাদী
তালিবানৰ বাবে এতিয়াও ডিঙিৰ কাঁইট হৈ আছে পঞ্জশিৰ উপত্যকা।শুকুৰবাৰে পঞ্জশিৰ তেওঁলোকৰ দখলত বুলি দাবী কৰিছিল তালিবানে। কিন্তু হিন্দুকুশ পৰ্বতে আৱৰা এই পঞ্জশিৰতে শনিবাৰে নিহত হ’ল ৭০০ তালিবানী জেহাদী।
নৰ্দান এলায়েন্স তথা প্ৰতিৰোধ বাহিনীৰ তৰফৰ পৰা সংবাদমাধ্যমক এইদৰে অৱগত কৰা হৈছে।
বাতৰি অনুসৰি, শনিবাৰে গোটেই দিন পঞ্জশিৰত তুমুল সংঘৰ্ষ হয়। তাতেই এতিয়ালৈকে ৭০০তালিবান যোদ্ধাই প্ৰাণ হেৰুৱাইছে বুলি দাবী কৰিছে মাছুদ বাহিনীয়ে। সেয়াই নহয়, মাছুদ বাহিনীৰ হাতত বহু তালিবান বন্দীও হৈছে।
দাবী অনুসৰি, আহম্মদ শ্বাহ মাছুদ বাহিনীৰ ওচৰত কমেও ৬০০ তালিবানে আত্মসমৰ্পন কৰিছে। বাকীসকলে পলায়নৰ চেষ্টা চলাইছে বুলি কোৱা হৈছে।
উল্লেখ্য যে শনিবাৰে পুৱাই তালিবানে পঞ্জশিৰ দখল কৰা বুলি দাবী কৰিছিল। কিন্তু এই দাবীৰ ২৪ঘন্টাৰ ভিতৰতে সলনি হৈছে দৃশ্যপট!
নৰ্দান এলায়েন্সে জানিবলৈ দিছে যে তেওঁলোক বৰ্তমান সুবিধাজনক স্থিতিত আছে। সকলোবোৰেই পূৰ্ব পৰিকল্পিতভাৱেই ঘটিছে। গোটেই প্ৰদেশখন নিজৰ নিয়ন্ত্ৰণত থকাৰ দাবী কৰিছে আফগান বাহিনীয়ে।
সূত্ৰসমূহৰ মতে, তালিবান বাহিনী পঞ্জশিৰৰ সীমাৰ ভিতৰত প্ৰৱেশ কৰাৰ পাছতেই প্ৰতিৰোধ বাহিনীয়ে আফগানিস্তানৰ মূল অঞ্চলৰ সৈতে তেওঁলোকৰ যোগাযোগৰ পথ বিচ্ছিন্ন কৰি দিছে। ফলত অস্ত্ৰ-শস্ত্ৰ, খাদ্য আদিৰ সৰবৰাহ বন্ধ হৈ পৰিছে।
সেইদৰে, অধিক অল্চলতে লেণ্ডমাইন পুতি ৰাখিছে প্ৰতিৰোধ বাহিনীয়ে। যাৰ বাবে তালিবান যোদ্ধা আগবাঢ়িলেই ৰণত পৰিছে।
প্ৰতিৰোধ বাহিনীৰ দাবীৰ সত্যতা প্ৰায় স্বীকাৰ কৰি তালিবানে শনিবাৰে চৰকাৰ গঠনৰ প্ৰক্ৰিয়া আৰু এসপ্তাহ পিছুৱাই দিছে।