স্বায়ত্তশাসিত জিলা সমষ্টিত এ এছ ডি চিৰ হলিৰাম তেৰাং, বিজেপিৰ হৰেন সিং বে’
লোকসভা নিৰ্বাচনৰ বতাহ বলাৰ লগে লগে ক্ৰমাত অকৰ্ষণীয় হ’বলৈ আৰম্ভ কৰিছে ৰাজ্যৰ ৰাজনীতি। ৰাজ্যখনৰ ১৪টা লোকসভা সমষ্টিৰ সমান্তৰালকৈ স্বায়ত্তশাসিত জিলা সমষ্টিটোতো আৰম্ভ হৈছে ৰাজনৈতিক দলসমূহৰ কুচকাৱাজ।
আজি সমষ্টিটোত দলীয় প্ৰাৰ্থী ঘোষণা কৰে পাহাৰীয়া জিলা দুখনৰ স্থানীয় ৰাজনৈতিক দল অট’ন’মাছ ষ্টেইট ডিমাণ্ড কমিটী চমুকৈ এ এছ ডি চিয়ে। সভাপতি তথা প্ৰাক্তন মন্ত্ৰী হলিৰাম তেৰাঙক প্ৰাৰ্থী হিচাপে প্ৰক্ষেপ কৰিছে দলটোৱে। দেওবাৰে ডিফুত এখন সংবাদমেলযোগে এ এছ ডি চিৰ সাধাৰণ সম্পাদক জৎচন বে’ই এই কথা ঘোষণা কৰে।
ইপিনে সমষ্টিটোত বিজেপিয়ে প্ৰাৰ্থিত্ব দিছে হৰেন সিং বে’ক। কংগ্ৰেছৰ পৰা বিজেপিত যোগদান কৰা তুলিৰাম ৰংহাঙৰ নামো উচ্চাৰিত হৈছিল যদিও শেষ পৰ্য্যন্ত হৰেন সিং বে’ই পায় টিকট।
বৰ্তমান সমষ্টিটো দখলত ৰখা কংগ্ৰেছে এতিয়াও ঘোষণা কৰা নাই প্ৰাৰ্থীৰ নাম। বীৰেন সিং ইংতি সমষ্টিটোৰ পৰা সাংসদ হৈ আছে যদিও শেহতীয়া বছৰকেইটাত তেওঁৰ জনসমৰ্থন তেনেই হ্ৰাস পোৱাত বিকল্পৰ চিন্তা কৰিছে কংগ্ৰেছ নেতৃত্বই।
মন কৰিব লগীয়া যে কাৰ্বি আংলং, পশ্চিম কাৰ্বি আংলং আৰু ডিমা হাচাও জিলাক সামৰি থকা সংসদীয় সমষ্টিটোৰ দুখনকৈ স্বায়ত্তশাসিত পৰিষদ আৰু আটাইকেইটা বিধান সভা সমষ্টিয়েই বৰ্তমান বিজেপিৰ দখলত। গতিকে সমষ্টিটোক লৈ বিজেপি খুবেই বেছি আশাবাদী।
কিন্তু পাহাৰীয়া স্বায়ত্তশাসিত জিলা সমষ্টিটোত স্থানীয় দল এ এছ ডি চিৰ যথেষ্ট প্ৰভাৱ আছে। সমান্তৰালকৈ এ এছ ডি চিক সমৰ্থন দিছে কাৰ্বি ছাত্ৰ সংস্থা আৰু কাৰ্বি নিমচ’ চিংথুৰ আচং-এ।
লগতে সমষ্টিটোৰ মূলতঃ কাৰ্বি আংলং জিলাত বসবাস কৰা বড়ো সকলক পাহাৰীয়া অনুসূচিত জনজাতিৰ মৰ্য্যাদা দিয়াৰ বিৰোধিতা কৰে অধিকাংশ কাৰ্বি লোকেই।
কিন্তু বিজেপি চৰকাৰলৈ আহিলে তেওঁলোকক পাহাৰীয়া অনুসূচিত জনজাতিৰ মৰ্য্যাদা দিয়া হ’ব বুলি মন্ত্ৰী ড০ হিমন্ত বিশ্ব শৰ্মাই ঘোষণা কৰিছিল। ইয়াৰ বিপৰীতে বিজেপিৰ এই স্থিতিৰ বিৰোধিতা কৰি নিৰ্বাচনত অৱতীৰ্ণ হ’ব এ এছ ডি চি। স্থানীয় দলটোৱে লগতে নাগৰিকত্ব সংশধনী বিধেয়কৰ বিৰোধিতাকো নিৰ্বাচনী এজেণ্ডাত ৰাখিব বুলি প্ৰকাশ কৰিছে।
পাহাৰীয়া জিলা দুখনৰ ৰাজনৈতিক দলটোৱে ইতিমধ্যেই ৰিজ’নেল ডেমক্ৰেটিক এলায়েন্স (আৰ ডি এ)ত যোগ দিছে। গতিকে এ এছ ডি চিৰ হৈ আৰ ডি এৰ অংশীদাৰ আন দুই দল ক্ৰমে লিবাৰেল ডেমক্ৰেটিক পাৰ্টি (এল ডি পি) আৰু অসম সংগ্ৰামী মঞ্চয়ো সমষ্টিটোত প্ৰচাৰ চলাব বুলি জানিব পৰা গৈছে।
এই পৰিপ্ৰেক্ষিতত সমষ্টিটোত তিনিকোণীয়া যুঁজ আকৰ্ষণীয় ৰূপত দেখা যাব।