চীনৰ হাংঝ’ত চলি থকা এছিয়ান গেমছত আজি বিয়লি ভাৰতে লাভ কৰিছে দুটাকৈ স্বৰ্ণ পদক। নতুন অভিলেখ স্থাপনেৰে অবিনাশ ছেবলে ৩০০০ মিটাৰ ষ্টীপলচেজত স্বৰ্ণ জয় কৰাৰ বিপৰীতে তাজিন্দৰপাল সিং টুৰে শ্বটপুটত অৰ্জন কৰে স্বৰ্ণ।
৮:১৯.৫০ মিনিটত দৌৰ সম্পূৰ্ণ কৰি অবিনাশে চলিত এছিয়ান গেমছৰ এথলেটিকছত প্ৰথমটো স্বৰ্ণ ভাৰতক উপহাৰ দিয়াৰ লগতে এছিয়ান গেমছৰ ইতিহাসত ৩০০০ মিটাৰ ষ্টীপলচেজত স্বৰ্ণ লাভ কৰা প্ৰথমজন ভাৰতীয় খেলুৱৈ হিচাপে পৰিগণিত হয়।
তদুপৰি তেওঁ এই ইভেণ্টত নতুন এছিয়ান গেমছ অভিলেখো স্থাপন কৰে। ২০১৮ চনৰ জাকাৰ্টাত ইৰাণৰ হোছেইন কেয়েহানীয়ে গঢ়া এছিয়ান গেমছৰ পূৰ্বৰ ৮:২২.৭৯ মিনিটৰ ৰেকৰ্ড ভংগ কৰি নিজৰ নামত ন অভিলেখ লিপিবদ্ধ কৰে।
ইফালে শ্বটপুটত স্বৰ্ণ পদক অৰ্জন কৰিছে দেশৰ কিংবদন্তি শ্বটপুট তাৰকা তাজিন্দৰপাল সিং টুৰে। ২০.৩৬ মিটাৰৰ শ্ৰেষ্ঠ থ্ৰ’ৰে তাজিন্দৰপালে হাংঝ’ত ভাৰতক দ্বাদশটো স্বৰ্ণ পদক উপহাৰ দিয়ে।
তদুপৰি বেডমিণ্টনৰ পুৰুষৰ শাখাত ভাৰতীয় পুৰুষ দলেও স্বৰ্ণ জয়ৰ সম্ভাৱনা উজ্জল কৰি ৰাখিছে। চলি থকা ফাইনেলত চীনৰ বিৰুদ্ধে ভাৰতীয় দলটো এইপৰ্যন্ত ২-০ ব্যৱধানত আগবাঢ়ি আছে।
অৱশ্যে এই সফলতাৰ বিপৰীতে ভাৰতীয় অনুৰাগীক নিৰাশ কৰিছে দেশৰ তাৰকা বক্সাৰ নিখাত জাৰিনে। ৫০ কেজি শাখাৰ ছেমি ফাইনেলত পৰাস্ত হৈ জাৰিন ব্ৰঞ্জৰ পদকতে সন্তুষ্ট থাকিবলগীয়া হয়।
