গুৱাহাটীত ভয়ংকৰ দুৰ্ঘটনা! নিহত ১জন, ৩টি শিশু আহত
শুকুৰবাৰে পুৱা গুৱাহাটীৰ জালুকবাৰীৰ সমীপৰ ৩৭ নং ৰাষ্ট্ৰীয় ঘাইপথত সংঘটিত পথ দুৰ্ঘটনাত এজন লোক নিহত হোৱাৰ লগতে তিনিগৰাকী কন্যা শিশু আহত হয়।
ৰেডিছন ব্লু হোটেলৰ বিপৰীতে থকা তেতেলিয়াত পুৱা প্ৰায় ৮:৩০ বজাত আজাৰাৰ গিৰিজানন্দ চৌধুৰী বিশ্ববিদ্যালয়লৈ গৈ থকা এখন বাছ (পঞ্জীয়ন নম্বৰ AS01FC0304)ৰ সৈতে দুচকীয়া বাহন (পঞ্জীয়ন নম্বৰ AS01DQ8841) সংঘৰ্ষ হয়।
মৃত যুৱকজন প্ৰফুল্ল দাস বুলি জানিব পৰা গৈছে। চিকিৎসালয়লৈ লৈ যোৱাৰ সময়তে তেওঁৰ মৃত্যু হয়।
শিশু তিনিটা গুৰুতৰভাৱে আঘাতপ্ৰাপ্ত হৈ ওচৰৰ চিকিৎসালয়ত ভৰ্তি কৰোৱা হয়, তেওঁলোকৰ অৱস্থা এতিয়া সুস্থিৰ বুলি জানিব পৰা গৈছে।
প্ৰত্যক্ষদৰ্শীয়ে জনোৱা মতে, দুচকীয়া বাহনখনত দুজন লোকহে বহিব পৰা সক্ষমতা থকাৰ পাছতো চাৰিজন আৰোহী আছিল—চালক আৰু তিনিটা শিশু। তিনিওটি শিশুৰ কোনো এজনেও হেলমেট পিন্ধা নাছিল।
ঘটনাৰ পাছতে বিশ্ববিদ্যালয় কৰ্তৃপক্ষই বাছ চালক কৃষ্ণ সোনাৰক জালুকবাৰী থানাত গতাই দিয়ে। পৰৱৰ্তী সময়ত তেওঁক গ্ৰেপ্তাৰ কৰা হয়।