যোৱা ১৮ বছৰত ভাৰতে হেৰুওৱা বন আচ্ছাদনৰ ৭৫%ই হৈছে সেউজীয়াৰ কাৰণে বিখ্যাত উত্তৰ-পূবৰ।
বানপানী, ভূমিকম্প, সৰ্বাধিক ভূ-কম্পপ্ৰৱণ অঞ্চলত বৃহৎ নদীবান্ধ আদিৰ চৰ্চাৰ মাজতে বিশ্বজুৰি বন ধ্বংস নিৰীক্ষণকাৰী ৱে’ব এপ গ্ল’বেল ফৰেস্ত ৱটচৰ তথ্যত এই ভয়াৱহ দিশ পোহৰলৈ আহিছে।
উত্তৰ-পূবৰ ভিতৰতো আকৌ অসম আছে বন আৱৰণ (tree cover) বিলুপ্তিৰ শীৰ্ষত।
২০০১ৰ পৰা ২০১৮ চনৰ ভিতৰত অসমে হেৰুৱাইছে ২৩৮৮.২৬ বৰ্গ কিঃ মিঃ পৰিমাণৰ বন আৱৰণ। আৰু মিজোৰামে হেৰুৱাইছে সৰ্বাধিক গছ (২০১৩-২০১৮, ১৩৯২ বৰ্গ কিঃ মিঃ)।
২০০০-১৮ চনৰ সময়চোৱাত সমগ্ৰ ভাৰতে হেৰুওৱা বন আচ্ছাদনৰ পৰিমাণ ১৬,৭৪৪ বৰ্গ কিঃ মিঃ। ইয়াৰে ১২৫২৩ বৰ্গ কিঃ মিঃ অৰ্থাৎ ৭৪.৭% উত্তৰ-পূবৰ ৰাজ্যকেইখনৰ।
প্ৰকাশিত বাতৰি মতে, এন ডি এ’ৰ শাসনত যোৱা ৫ বছৰত কমক ছাৰি ২গুণলৈ বৃদ্ধি পাইছে বন ধ্বংস।
২০১৩ৰ পৰা ২০১৮ চনৰ ভিতৰত ভাৰতে হেৰুৱাইছে ৬৮৬৭.৫৭ বৰ্গ কিঃ মিঃ এলেকাৰ বন আচ্ছাদন।
এমেৰিকাৰ ইউনিভাৰ্ছিটি অৱ মেৰিলেন্দে লেন্দছেট ছবি (Landsat imagery) আৰু ৰিম’ট ছেন্সিং এলগৰিদম (remote sensing algorithms)ৰ ব্যৱহাৰেৰে এই জৰীপটো চলাইছিল।
গ্ল’বেল ফৰেস্ত ৱটছ বাস্তৱ সময়ত বিশ্বজুৰি বন ধ্বংস নিৰীক্ষণ কৰি থাকিব পৰা এটা ৱে’ব এপ্লিকে’চন।
এই ৱে’ব এপ্লিকে’চনটোৰ উদ্যোক্তা হৈছে মেকআৰ্থাৰ ফাউন্দে’চন নামৰ এমেৰিকান ফান্দিং এজ’ন্সিৰ ধনেৰে চলা ৱৰ্ল্দ ৰিচৰ্চেজ ইনষ্টিটিউট।
এই প্ৰকল্পটোত ইউনিৰ্ভাছিটি অৱ মেৰিলেন্দৰ উপৰি গুগল, ইউ এছ এইদ (USAid) আদি সংস্থাও জৰিত হৈ আছে।
