২০২১ৰ অসম বিধানসভাৰ নিৰ্বাচনৰ দিন ঘোষণাক কেন্দ্ৰ কৰি ৰাজ্যৰ ৰাজনৈতিক মহলত উৎকণ্ঠা বিৰাজ কৰি থকাৰ সময়তে প্ৰধানমন্ত্ৰী নৰেন্দ্ৰ মোদীৰ এক ঘোষণাই বিশেষভাৱে চৰ্চা লাভ কৰিছে।
মাৰ্চৰ প্ৰথম সপ্তাহত ঘোষণা কৰা হ’ব পাৰে ২০২১ চনৰ অসম বিধানসভাৰ নিৰ্বাচনৰ দিন। মংগলবাৰে চিলাপথাৰৰ জনসভাত উপস্থিত থাকি প্ৰধানমন্ত্ৰী নৰেন্দ্ৰ মোদীয়ে এইদৰে কোৱাৰ পিছতে বিশেষভাৱে চৰ্চা লাভ কৰিছে ৰাজনৈতিক মহলত সমগ্ৰ বিষয়টো।
ভাষণ প্ৰসংগত প্ৰধানমন্ত্ৰী মোদীয়ে কয় যে অসম, পশ্চিমবংগ, তামিলনাডু, কেৰলা আৰু পণ্ডুচেৰীৰ বিধানসভাৰ নিৰ্বাচনৰ দিন মাৰ্চৰ প্ৰথমটো সপ্তাহত ঘোষণা কৰা হ’ব পাৰে।
“মই জানো আপোনালোকে নিৰ্বাচনৰ বাবে অধীৰ আগ্ৰহেৰে ৰৈ আছে। নিৰ্বাচন আয়োগে যোৱা ২০১৬ৰ নিৰ্বাচন দিন ৪ মাৰ্চত ঘোষণা কৰিছিল, এইবাৰো নিৰ্বাচন আয়োগে যোৱাবাৰৰ দৰে মাৰ্চ মাহৰ প্ৰথমটো সপ্তাহৰ যিকোনো এটা দিনতে ঘোষণা কৰিব পাৰে।” প্ৰধানমন্ত্ৰী নৰেন্দ্ৰ মোদীয়ে জনসভাক উদ্দেশ্যি এইদৰে কয়।
“নিৰ্বাচন আয়োগে অসম, পশ্চিমবংগ, কেৰলা, তামিলনাডু আৰু পণ্ডুচেৰীৰ নিৰ্বাচনৰ দিন ঘোষণা অহা ৭ মাৰ্চৰ পূৰ্বে কৰিব বুলি আমি ধৰি ল’ব পাৰো।” প্ৰধানমন্ত্ৰীয়ে লগতে কয়।
প্ৰধানমন্ত্ৰী নৰেন্দ্ৰ মোদীৰ এই মন্তব্যৰ পিছতে ৰাজনৈতিক ভূ-ৰখা মহলে মাৰ্চৰ প্ৰথমটো সপ্তাহতে অসম বিধানসভাৰ ২০২১ নিৰ্বাচনৰ দিন ঘোষণা কৰাটো প্ৰায় খাটাং বুলি ধাৰণা কৰিছে।
