ছৈয়দ মুস্তাক আলী টি-২০ ক্ৰিকেটত স্বপ্নৰ যাত্ৰা অব্যাহত ৰাখিছে অসমে। দেওবাৰে ছত্তীশগড়ক পৰাস্ত কৰি আত্মবিশ্বাসী হৈ থকা অসমে আজি গ্ৰুপ ডিৰ এখন খেলত শক্তিশালী বংগক ২৬ ৰাণত পৰাস্ত কৰে।
ওড়িশাৰ বাৰাবটি ষ্টেডিয়ামত অনুষ্ঠিত হোৱা খেলখনত বংগই টছত জয়ী হৈ অসমক প্ৰথমে বেটিং কৰাৰ বাবে আমন্ত্ৰণ জনায়। অসমে খেল আৰম্ভ কৰি ভাৰতীয় দলৰ প্ৰাক্তন বেগী ব’লাৰ অশোক ডিণ্ডাৰ তীক্ষ্ণ বলিঙৰ সন্মুখত এক ৰাণতে স্বৰুপম পুৰুকায়স্থ(০) উইকেট হেৰুৱায়। শিৱশংকৰ ৰয় আৰু উদীয়মান যুৱ ক্ৰিকেটাৰ ৰিয়ান পৰাগৰ বিস্ফোৰক অৰ্ধশতৰাণৰ সহায়ত অসমে নিৰ্ধাৰিত ২০ অভাৰত পাঁচটা উইকেট হেৰুৱাই ১৬২ ৰাণ সংগ্ৰহ কৰে।
শিৱশংকৰ ৰয়ে মাৰমুখী বেটিঙেৰে ৫৩ টা ব’লত ৮৩ ৰাণ সংগ্ৰহ কৰি দুৰ্ভাগ্যজনক ভাবে ৰাণ আউট হোৱাৰ বিপৰীতে ৰিয়ান পৰাগে সংগ্ৰহ কৰে ৫২ ৰাণ।বংগৰহৈ অশোক ডিণ্ডাই চাৰিটা উইকেট দখল কৰে।
অসমে বান্ধি দিয়া ১৬৩ ৰাণৰ লক্ষ্য আগত ৰাখি খেলিবলৈ আৰম্ভ কৰি বংগই অসমৰ বলাৰ সকলৰ সুন্দৰ আৰু নিয়ন্ত্ৰিত বলিঙৰ সন্মুখত তিষ্ঠিব নোৱাৰি নিৰ্ধাৰিত অভাৰত ৯ টা উইকেট হেৰুৱাই ১৩৬ ৰাণহে কৰিবলৈ সক্ষম হয়। অসমৰ ব’লাৰৰ সন্মুখত ব্যৰ্থ হয় ভাৰতীয় জাতীয় দলৰ হৈ খেলা ঋদ্ধিমান সাহা(১১), মনোজ তিৱাৰী(৩)ৰ দৰে তাৰকা। বংগৰহৈ সৰ্বাধিক ৰাণ সংগ্ৰহ কৰে শ্ৰীবৎস গোস্বামীয়ে।
অসমৰ হৈ বলিঙত আবু নাছিম আহমেদ আৰু মুখটাৰ হুছেইনে দুটাকৈ উইকেট দখল কৰাৰ বিপৰীতে প্ৰীতম দাস, ৰাজাকুদ্দিন আহমেদ, পল্লৱ কুমাৰ দাস আৰু ৰিয়াণ পৰাগে এটাকৈ উইকেট দখল কৰিবলৈ সক্ষম হয়।
অসমে চাৰিখন খেলৰ ভিতৰত তিনিখনত জয়ীহৈ ১২ পইণ্টেৰে গ্ৰুপ ডিৰ দ্বিতীয় স্থানত আছে।
