আগন্তুক লোকসভা নিৰ্বাচনৰ বাবে ৰাজ্যৰ ১০টা সমষ্টিৰ বাবে প্ৰাৰ্থীৰ পেনেল প্ৰস্তুত কৰি উলিয়াইছে ৰাজ্যিক বিজেপিয়ে। উক্ত প্ৰাৰ্থী তালিকা লৈ আজি সন্ধিয়া ৫ বজাত বিজেপিৰ ৰাজ্যিক নেতৃত্ব দিল্লীলৈ ৰাওনা হ’ব বুলি সংবাদমেলত জনালে সভাপতি ৰঞ্জিত দাসে। সভাপতি ৰঞ্জিত দাসৰ লগতে হিমন্ত বিশ্বও দিল্লীলৈ যাব।
মুঠ ১০টা সমষ্টিৰ বাবে এই short listed প্ৰাৰ্থী তালিকাখন প্ৰস্তুত কৰি উলিয়াইছে ৰাজ্যিক নেতৃত্বই। দলটোৰ এটা উচ্চস্তৰীয় সূত্ৰই জনোৱা মতে, তেজপুৰত কেৱল হিমন্ত বিশ্বৰ নাম পেনেলত অন্তৰ্ভুক্ত কৰা হৈছিল যদিও শেষ মুহূৰ্তত বৰ্তমানৰ সাংসদ আৰ পি শৰ্মাৰ নামো অন্তৰ্ভুক্ত কৰা হৈছে।
বৰ্তমানৰ আটাইকেইজন সাংসদৰ নাম অন্তৰ্ভুক্ত হৈছে পেনেলত। যদিও আৰ পি শৰ্মাৰ নাম বাদ পৰিব বুলি এটা জনৰৱ ওলাইছিল, শেষ মুহূৰ্তত তেওঁৰ নাম অন্তৰ্ভুক্ত হৈছে।
উল্লেখযোগ্য যে কোকৰাঝাৰ সমষ্টিটো মিত্ৰ বি পি এফক এৰি দিছে বিজেপিয়ে। গতিকে পেনেলত অন্তৰ্ভুক্ত নোহোৱা সমষ্টিকেইটা হ’ল- বৰপেটা, ধুবুৰী আৰু কলিয়াবৰ। এইকেইটা সমষ্টিকেই নতুনকৈ পুনৰ মিত্ৰতালৈ অহা অগপক এৰি দিয়াৰ সম্ভাৱনা আছে দলটোৱে। ইতিমধ্যে অগপৰ মন্ত্ৰী কেশৱ মহন্তৰ ভায়েক মণিমাধৱ মহন্তক কলিয়াবৰ সমষ্টিটোৰ অগপৰ প্ৰাৰ্থী হিচাপে প্ৰক্ষেপ কৰাৰ কথা ওলাই আছে।
সংবাদমেলত আজি ৰাজ্যিক বিজেপিৰ নেতৃত্বই জনোৱা মতে, অমিত শ্বাহৰে আলোচনা কৰি কাইলৈৰ ভিতৰত এই পেনেলত অন্তৰ্ভুক্ত সমষ্টিকেইটাৰ প্ৰাৰ্থী চূড়ান্ত কৰা হ’ব আৰু কাইলৈয়ে চূড়ান্ত তালিকাখনো প্ৰকাশ কৰা হ’ব।
১০ সমষ্টিৰ পেনেলত অন্তৰ্ভুক্তসকল-
১। ডিব্ৰুগড়:- ৰামেশ্বৰ তেলী (বৰ্তমানৰ সাংসদ), পুলক গোঁহাই৷
২। যোৰহাট :- তপন গগৈ (সোণাৰিৰ বিধায়ক), কামাখ্যা প্ৰসাদ তাছা (বৰ্তমানৰ সাংসদ), লক্ষ্য কোঁৱৰ, শান্তনু গগৈ৷
৩। লখিমপুৰ:- প্ৰদান বৰুৱা (বৰ্তমানৰ সাংসদ), হৰেন দেউৰী
৪। তেজপুৰ:- হিমন্ত বিশ্ব শৰ্মা (বৰ্তমান জালুকবাৰী সমষ্টিৰ বিধায়ক), আৰ পি শৰ্মা (বৰ্তমানৰ সাংসদ)।
৫। নগাঁও:- ৰূপক শৰ্মা, ৰাজেন গোহাঁই (বৰ্তমানৰ সাংসদ)
৬। গুৱাহাটী:- বিজয়া চক্ৰবৰ্তী (বৰ্তমানৰ সাংসদ), বিজুলী কলিতা মেধি, কুইন ওজা আৰু ৰূপম গোস্বামী৷
৭। মঙলদৈ:- ৰমেন ডেকা (বৰ্তমানৰ সাংসদ), দিলীপ শইকীয়া, জয়ন্ত মল্ল বৰুৱা৷
৮। স্বায়ত্তশাসিত সমষ্টি :- হৰেন সিং বে’, বিদ্যাসিং ইংলেং, বিধায়ক তুলিৰাম ৰংহাঙৰ পত্নী৷
৯। শিলচৰ:- ৰাজদ্বীপ ৰয়, পৰিমল শুক্লবৈদ্য (ধলাই সমষ্টিৰ বিধায়ক)
১০। কৰিমগঞ্জ:- কৃপানাথ মল্লা, অমৰেশ ৰায়
