আজি ৰাজ্যজুৰি পালন কৰা হয় ফাগুনৰ ৰঙৰ উৎসৱ ফাকুৱা। ৰাজ্যৰ বিভিন্ন প্ৰান্তৰ লগতে ৰাজ্যিক বিজেপিৰ কাৰ্য্যালয়তো হোলী উদযাপন কৰা হয়।
ৰাজ্যিক বিজেপিৰ সাংগঠনিক সম্পাদক ফনীন্দ্ৰ নাথ শৰ্মাৰ নেতৃত্বত বিজেপিৰ কৰ্মকৰ্তা সকল হোলী খেলাৰ উদ্দেশ্যৰে মুখ্য মন্ত্ৰী সৰ্বানন্দ সোণোৱালৰ বাসগৃহত উপস্থিত হয় আৰু সোণোৱালৰ গাত ৰঙৰ আবিৰ সানে।
সোণোৱালে সমগ্ৰ অসম বাসীলৈ হোলীৰ শুভেচ্ছা জ্ঞাপন কৰে আৰু ৰঙৰ উৎসৱ হোলীয়ে বৰাক-ব্ৰহ্মপুত্ৰ উপত্যকাত একতা বৃদ্ধি কৰিব বুলি মন্তব্য কৰে।
বিজেপিৰ কৰ্মকৰ্তাৰ দলটোৱে মুখ্য মন্ত্ৰীৰ লগতে বিধানসভাৰ অধ্যক্ষ হিতেন্দ্ৰ নাথ গোস্বামী, চন্ত্ৰমোহন পাটোৱাৰী, পল্লৱ লোচন দাস আৰু পিযুষ হাজৰিকাৰ বাসগৃহতো উপস্থিত হৈ সকলোকে ৰঙেৰে একাকাৰ কৰে।
পল্লৱ লোচন দাস আৰু পিযুষ হাজৰিকাই নিৰ্বাচনৰ ফলাফলৰ পাছত ইয়াতকৈও ডাঙৰকৈ হোলী উদযাপন কৰা হ’ব বুলি মন্তব্য কৰে।
‘‘আমি নিৰ্বাচনৰ ফলাফলৰ পাছত অটল বিহাৰী বাজপেয়ী ভৱনত হোলী উৎসৱ পতাটো এটা পৰম্পৰাত পৰিণত হৈছে, এইবাৰো ইয়াৰ ব্যতিক্ৰম নহ’ব। অসমৰ ৰাইজে আগন্তুক নিৰ্বাচনত বিজেপিক পুনৰবাৰ ক্ষমতাত অধিস্থিত কৰি নৰেন্দ্ৰ মোদীক প্ৰধান মন্ত্ৰী কৰিব’’ এনেদৰে মন্তব্য কৰে মন্ত্ৰী পিযুষ হাজৰিকাই।
আনহাতে, ডিব্ৰুগড়তো বিধায়ক প্ৰশান্ত ফুকনে পৰিয়াল আৰু সমষ্টিৰ লোক সকলৰ লগত হোলী খেলে।
বিজেপিৰ লগতে অগপ আৰু কংগ্ৰেছৰো বিভিন্ন নেতা-কৰ্মী সকলে ফাকুৱা উৎসৱ উলহ-মালহেৰে উদযাপন কৰে।
