কৰীণা কাপুৰৰ ‘ব্যতিক্ৰমী মহিলা’ৰ মাজত স্থান লাভ অসমৰ পৰিৱেশবিদ পূৰ্ণিমা দেৱী বৰ্মনৰ
বলীউদৰ নায়িকা কৰীণা কাপুৰে এক প্ৰচাৰ অভিযান আৰম্ভ কৰিছে। পৃথিৱীখনৰ পৰিৱৰ্তনত প্ৰভাৱ পেলোৱা কিছু মহিলাক লগ পোৱাৰ উদ্দেশ্যেৰে কৰীণাই আৰম্ভ কৰিছে এক যাত্ৰা।
‘এ এন ডি আটমন’১৮’ৰ বেনাৰৰ অধীনৰ প্ৰকল্পটোৱে লগতে এখন উন্নত সমাজৰ দিশত তেওঁলোকৰ বিশেষ ক্ষেত্ৰখনত কাম কৰা মহিলাসকলৰ মাজত স্থান লাভ কৰিছে অসমৰ পৰিৱেশবিদ তথা গ্ৰীণ অস্কাৰ বিজয়ী পূৰ্ণিমা দেৱী বৰ্মনে।
উল্লেখ্য যে, পৰিৱেশবিদ পূৰ্ণিমা দেৱী বৰ্মনে যোৱা মাহত চতুৰ্থ য়ামিন হাজৰিকা ব্যতিক্ৰমী মহিলা বঁটা-২০১৮’ৰে সন্মানিত হৈছে।
তেওঁ অসমত ক্ৰমে বিলুপ্তপ্ৰায় হৈ উঠা হাড়গিলাৰ সংৰক্ষণৰ বাবে নিৰৱচ্ছিন্নভাৱে কাম কৰি আহিছে।
বৰ্মনে এককভাৱে বিলুপ্তপ্ৰায় পক্ষীবিধৰ সংৰক্ষণৰ বাবে ‘হাড়গিলা সেনা’ হিচাপে পৰিচিত এদল স্থানীয় মহিলাৰ সহযোগত এক আন্দোলন গঢ়ি তুলিছে।
কেইবা বছৰ ধৰি বৰ্মনে বিলুপ্তপ্ৰায় হাড়গিলাৰ সংৰক্ষণৰ বাবে কামৰূপ জিলাৰ দদৰা, পচৰীয়া আৰু শিঙিমাৰি গাঁৱত কাম কৰি আছে। তেওঁৰ এই সংৰক্ষণৰ কামটোৱে বিশ্বজনীন স্বীকৃতি লাভ কৰিছে।
কৰীণাই আৰম্ভ কৰা ব্যতিক্ৰমী মহিলাৰ এই অভিযানত স্থান পোৱা আন মহিলাৰ ভিতৰত আছে ‘ক্ৰছবও মাইলছ’ৰ প্ৰতিষ্ঠাপক সৃষ্টি বক্সী। তেওঁ গোটেই দেশতে মহিলাৰ সুৰক্ষা বিষয়ত অক্লান্তভাৱে কাম কৰি আছে।
শিশু কল্যাণ আৰু শিক্ষাৰ বাবে কাম কৰি থকা ‘লক্ষ্যম’ৰ প্ৰতিষ্ঠাপক ৰাশী আনন্দেও এই অভিযানত স্থান পাইছে। শিশুৰ কল্যাণ তথা দৰিদ্ৰ মহিলাসকলৰ বাবে কাম কৰি অহা আন এগৰাকী মহিলা প্ৰিয়ংকা ৰাইনাৰ নাম আছো তালিকাত। ৰাইনা ‘গ্ৰেচিয়া ৰাইনা ফাইণ্ডেশ্যন’ৰ প্ৰতিষ্ঠাপক।
ছ’চিয়াল মিডিয়াত প্ৰচাৰ হোৱা ভিডিঅ’টোত পূৰ্ণিমা বৰ্মনে গুৰুত্ব আৰোপ কৰিছে যে আমি কটা প্ৰতিজোপা গছে আমাৰ ভৱিষ্যতৰ ওপৰত এক ব্যাপক প্ৰভাৱ পেলাব। তদুপৰি বৰ্মনে আমাৰ বনাঞ্চল সংৰক্ষণ তথা বন্যপ্ৰাণী সুৰক্ষাৰ বাবে এক অন্তৰ্স্পৰ্শী আৱেদন জনাইছে।
এই প্ৰচাৰাভিযানৰ ট্যাগলাইনটো হৈছে- আমি যদি আমাৰ কাইলৈক প্ৰভাৱিত কৰিব বিচাৰো, আমি আজিয়েই পৰিৱৰ্তন হোৱা উচিত নহয়নে?