অসম চৰকাৰৰ প্ৰাক্তন মুখ্য সচিব ডঃ হৰেন্দ্ৰ নাথ দাস আৰু নাই। শুকুৰ বাবে নিশা প্ৰায় চাৰে আঠ বজাত কামৰূপ জিলাৰ গীতানগৰস্থিত নিজ বাসগৃহত শেষ চকু মুদে প্ৰাক্তন বিষয়াগৰাকীয়ে।
১৯৩৭ চনৰ ১ মাৰ্চত মহানগৰীৰ পাণবজাৰত জন্মগ্ৰহণ কৰিছিল হৰেন্দ্ৰ নাথ দাসে। মৃত্যুৰ সময়ত তেখেতৰ বয়স আছিল ৮৭ বছৰ।
অসমৰ চৰকাৰৰ মুখ্য সচিবৰ লগতে চৰকাৰৰ বিভিন্ন বিভাগৰ গুৰুত্বপূৰ্ণ দায়িত্বত আছিল হৰেন্দ্ৰ নাথ দাস।
১৯৬১ চনতে উচ্চ পদস্থ বিষয়া হিচাপে চাকৰিত যোগদান কৰি কেন্দ্ৰীয় বিত্ত মন্ত্ৰালয়ৰ সঞ্চালকৰ দায়িত্ব লাভ কৰিছিল হৰেন্দ্ৰ নাথ দাসে। তাৰপিছতো কেইবাটাও বিভাগৰ শীৰ্ষ দায়িত্বত আছিল বিষয়াগৰাকী।
১৯৯০ চনত প্ৰফুল্ল কুমাৰ মহন্তৰ চৰকাৰৰ দিনত ৰাজ্য চৰকাৰৰ মুখ্য সচিব হিচাপে দায়িত্ব লাভ কৰিছিল ডঃ হৰেন্দ্ৰ নাথ দাসে। ১৯৯৫ চনলৈ অসম চৰকাৰৰ মুখ্য সচিব আছিল তেওঁ।
জানিব পৰা মত্তে, মৃত্যুৰ সময়ত তেওঁৰ পত্নী, পুত্ৰ আৰু কন্যাক ইহসংসাৰত এৰি থৈ যায়।
