তিৱা স্বায়ত্ত শাসিত পৰিষদৰ নিৰ্বাচনৰ বাবে উক্ত অঞ্চলত অহা ১৭ ডিচেম্বৰৰ দিনটো ৰাজ্য চৰকাৰে স্থানীয় বন্ধৰ ঘোষণা কৰিছে।
এই বন্ধত চৰকাৰী, বেচৰকাৰী, স্থানীয় সংস্থা, বেংক, শিক্ষা প্ৰতিষ্ঠান আদি সকলো বন্ধ থাকিব বুলি কোৱা হৈছে।
তিৱা স্বায়ত্ব শাসিত পৰিষদ চাৰিখন জিলা ক্ৰমে নগাঁও, মৰিগাঁও, হোজাই আৰু কামৰূপ মহানগৰ জিলাত বিয়পি আছে।
এই চাৰিখন জিলাত সমষ্টি আছে সৰ্বমুঠ ৩৬টা।
১৭ ডিচেম্বৰ ৰাতিপুৱা ৭.৩০ৰ পৰা সন্ধিয়া ৪.৩০ বজালৈ ভোটদান প্ৰক্ৰিয়া চলিব। যদি লেই দিনটোত বিশেষ কিবা কাৰণত ভোটদান সম্ভৱ নহয় তেন্তে ১৮ ডিচেম্বৰত পুনৰ এবাৰ ভোটদান অনুষ্ঠিত হ’ব।
উল্লেখ্য যে তিৱা স্বায়ত্তশাসিত পৰিষদৰ কামৰূপ মহানগৰৰ বাবে ১০০টা ভোটকেন্দ্ৰ ঠিক কৰা হৈছে।
এই অঞ্চলত মুঠ ভোটাৰৰ পৰিমাণ হ’ল ৭৮,১৮০ যাৰ ভিতৰত ৩৮,৩৬০ জন পুৰুষ আৰু ৩৯,৮২০ গৰাকী মহিলা ভোটাৰ।
১৯ ডিচেম্বৰৰ ৰাতিপুৱা ৮বজাৰ পৰা ভোট গণনা সোণাৰাম উচ্চতম মাধ্যমিক বিদ্যালয়ত আৰম্ভ হ’ব।
উল্লেখ্য যে তিৱা পৰিষদীয় নিৰ্বাচনৰ প্ৰতি লক্ষ্য ৰাখি শাসকীয় বিজেপিৰ লগতে বিৰোধী কংগ্ৰেছ আৰু অন্যান্য দল-সমূহে প্ৰচাৰ অভিযান তীব্ৰতৰ কৰি তুলিছে।
