অসমৰ প্ৰেক্ষাপটত প্ৰধান মন্ত্ৰী মোদীৰ ডিজিটেল ইণ্ডিয়াৰ ধাৰণাটো ধোঁৱাচাঙত উঠা বুলি ক’ব পাৰি।
তথ্য-প্ৰযুক্তিৰ আজিৰ দ্ৰুত অগ্ৰগতিৰ যুগত অসম চৰকাৰৰ মূল ৱেবছাইটটো মসৃণভাৱে য়ুজাৰ ফ্ৰেইণ্ডলি নোহোৱাৰ উপৰি শেহতীয়া তথ্যৰ সৈতে আপডেইট নহয়।
এজন য়ুজাৰে আজি ৰাজ্য চৰকাৰৰ assam.gov.in নামৰ ৱেবছাইটটো ভিজিট কৰাৰ পিছত আৱিষ্কাৰ কৰে যে এইটো এতিয়াও Beta ভাৰ্চনতে আছে।
তাৰোপৰি ম’বাইলত ৱেবছাইটটো ভালদৰে খোল নোখোৱা বুলিও তেওঁ অভিযোগ কৰে।
“মই বহু সময় ধৰি চৰকাৰী ৱেবছাইটটোত উচ্চপদস্থ বিষয়াৰ ই-মেইল, ফোন নম্বৰ তথা তেওঁলোক কি পদবীত আছে জানিবলৈ খুঁচৰি আছো। কিন্তু ম’বাইলত ছাইটটো অনুপযুক্ত ডিছপ্লেইৰ সৈতেহে খোল খায় আৰু ইয়াত শেহতীয়া তথ্যবোৰ নাই”, য়ুজাৰগৰাকীৰ ভাষ্য।
“মইতো অনবৰতে লেপটপটো লগত লৈ ফুৰিব নোৱাৰো”, তেওঁ লগতে কয়।
একেদৰে আন কেইবাগৰাকী ভুক্তভোগীয়ে ম’বাইলত ৱেবছাইটটো ভালকৈ চাব পৰা নাই বুলি অভিযোগ কৰে।
এই সন্দৰ্ভত আমাৰ সাংবাদিকে মুখ্য সচিব আলোক কুমাৰৰ সৈতে যোগাযোগ কৰি তেওঁৰ পৰা জানিব বিচাৰি সোধে, “চৰকাৰৰ মূল ৱেবছাইটটো ম’বাইল ফ্ৰেইণ্ডলি হৈ উঠা নাই নেকি? আজি বহুজনে ম’বাইলত ৱেবছাইটটো চাব পৰা নাই বুলি অভিযোগ কৰিছে। আৰু বৰ্তমানো Beta Version-তে আছে নেকি?”
“ঠিক আছে, মই এই বিষয়ে খবৰ লৈ আছো”, কেৱল এই সংক্ষিপ্ত উত্তৰহে দিয়ে মুখ্য সচিব আলোক কুমাৰে।
ইপিনে, এই বিষয়ত NIC বিভাগৰ দিগন্ত বৰ্মন নামৰ এজন বিষয়াৰ সৈতে কথা পতাত তেওঁ কয় “মই এতিয়া গুৱাহাটীত নাই। কিবা হৈছে নেকি খবৰ কৰি চাই আছো। হ’ব পাৰে ম’বাইল কম্পেটিবিলিটি নাই নেকি সুধিব লাগিব।”
আন এজন য়ুজাৰে কয় যে চৰকাৰৰ প্ৰায়বোৰ বিভাগৰ ৱেবছাইট আপডেইট নহয়। আৰক্ষীৰ ৱেবছাইট চালে তাত পোৱা আৰক্ষী থানাৰ ফোন নম্বৰবোৰ উল্লেখ কৰা থানাখনত নালাগি আন ক’ৰবাত লাগে। আৰক্ষী বিষয়াসকলৰ নামতো আছে ব্যাপক খেলিমেলি।
