ধুবুৰীৰ কচমো বজাৰত সংঘটিত হৈছে এক মৰ্মান্তিক ঘটনা। লাইনৰ পোষ্টত হৰ্ডিং লগাবলৈ গৈ বিদ্যুৎস্পৃষ্ট হৈ জীৱন-মৃত্যুৰে যুঁজিছে এজন শ্ৰমিকে।
অভয়াপুৰীৰ ৩০ বছৰীয়া শ্ৰমিক বিপুল মণ্ডল নামৰ এজন যুৱকে ১১ হাজাৰ ভল্ট কঢ়িয়াই অনা হাই ভল্টেজ বিদ্যুৎ কেবলৰ সংস্পৰ্শলৈ আহি গুৰুতৰভাৱে আঘাতপ্ৰাপ্ত হয়।
এই আঘাতৰ ফলত তেওঁ কাৰেন্টৰ খুঁটাৰ পৰা তললৈ বাগৰি পৰে। লগে লগে তেওঁক ধুবুৰী চিলাৰায় চিকিৎসালয়লৈ প্ৰেৰণ কৰা হয়। জানিব পৰা মতে, বৰ্তমানৰ তেওঁৰ অৱস্থা সংকটজনক।
প্ৰত্যক্ষদৰ্শীয়ে প্ৰকাশ কৰা মতে, মণ্ডলে হৰ্ডিং স্থাপন কৰিবলৈ খুঁটাত উঠি যোৱাৰ সময়ত কোনো ধৰণৰ সুৰক্ষা কৱজ ব্যৱহাৰ কৰা নাছিল।
অভিযোগ অনুসৰি হৰ্ডিং স্থাপনৰ তদাৰক কৰা ঠিকাদাৰে প্ৰয়োজনীয় সুৰক্ষা সঁজুলি যোগান ধৰা নাছিল। যাৰ বাবে শ্ৰমিকজনে ভয়াৱহ বিপদৰ সন্মুখীন হ’বলগীয়া হয়।
ধুবুৰী আৰক্ষীয়ে সুৰক্ষা উলংঘা ওপৰত গুৰুত্ব আৰোপ কৰি ঘটনা সন্দৰ্ভত তদন্ত আৰম্ভ কৰিছে। সংস্থাপনৰ কাম আৰম্ভ হোৱাৰ পূৰ্বে উপযুক্ত অনুমতি আৰু সতৰ্কতামূলক ব্যৱস্থা গ্ৰহণ কৰা হৈছিল নে নাই সেই বিষয়েও কৰ্তৃপক্ষই তদন্ত কৰিছে।
