বোকাখাতৰ ৰাজহুৱা খেল পথাৰত অহা ২৭ , ২৮ ,২৯ আৰু ৩০ ডিচেম্বৰ তাৰিখে চাৰিদিনীয়া কাৰ্যসুচীৰে ২৮ সংখ্যক অসম মাষ্টাৰ্চ এথলেটিকছ প্ৰতিযোগিতা অনুষ্ঠিত হ’ব।
বোকাখাত জিলা মাষ্টাৰ্চ এথলেটিকছ সন্থাৰ বিশেষ উদ্যোগত অনুষ্ঠিত হ’ব লগা এই প্ৰতিযোগিতাৰ প্ৰস্তুতি সম্পূৰ্ণ কৰিছে আয়োজক সমিতিয়ে। সোমবাৰে বোকাখাতৰ পুৱতি সাহিত্য সভা ভৱনত আয়োজিত এক সংবাদ মেলত এই কথা অৱগত কৰে আয়োজক সমিতিৰ সাধাৰণ সম্পাদক সুবোধ বৰাই।
প্ৰতিযোগিতাত অসমৰ প্ৰায়বোৰ জিলাৰ পৰা মুঠ ২০০০ পুৰুষ আৰু ৭৩০ গৰাকী মহিলা খেলুৱৈয়ে যোগদান নিশ্চত কৰিছে বুলি আয়োজক সমিতিয়ে জনায়।
ৰাজ্যৰ দুখন জিলা ক্ৰমে ধুবুৰী আৰু মাজুলীয়ে বিশেষ কাৰণ বশতঃ এই প্ৰতিযোগিতাত অংশ গ্ৰহন নকৰে বুলি সংবাদ মেলত সদৰি কৰে আয়োজক সমিতিয়ে।
২৭ ডিচেম্বৰত হ’ব লগা প্ৰতিযোগিতাৰ উন্মোচনী অনুষ্ঠানত মুখ্য মন্ত্ৰী সৰ্বানন্দ সোণোৱালে অংশগ্ৰহণ কৰি প্ৰতিযোগিতাৰ উদ্বোধন কৰিব। এই অনুষ্ঠানতে বোকাখাতৰ দুজন প্ৰবীন খেলুৱৈ অৱসৰ প্ৰাপ্ত আৰক্ষী বিষয়া প্ৰতুল ফুকন আৰু বেডমিন্টনৰ প্ৰাক্তন ৰাষ্ট্ৰীয় চেম্পিয়ন সুশান্ত বৰাক সম্বৰ্ধনা জনাব উদযাপন সমিতিয়ে।
এই প্ৰতিযোগিতাত বয়সৰ আধাৰত ২৩ টা বিভাগত মুঠ ২২ টা শাখাত খেল অনুষ্ঠিত হ’ব। প্ৰতিযোগিতাত লখিমপুৰ জিলাৰ পৰা সৰ্বাধিক আৰু ওদালগুৰি জিলাৰ পৰা সৰ্বনিম্ন প্ৰতিযোগিয়ে অংশ গ্ৰহণ কৰিব।
গৃহ জিলা হিচাপে বোকাখাতৰ ৪৪ জন পুৰুষ আৰু ২২ গৰাকী মহিলা প্ৰতিযোগিয়ে অংশ গ্ৰহন কৰিব। ইফালে প্ৰতিযোগিতাত ৯০ বছৰ ঊৰ্ধ্বৰ ৬ গৰাকী খেলুৱৈয়ে যোগদান নিশ্চত কৰিছে। ইয়াৰে এজন হ’ল বোকাখাতৰ বদুলীপাৰৰ উপেন বৰুৱা।
মুঠ ১০০ পৰিচালক আৰু স্বেচ্চাসেৱকৰ লগতে প্ৰায় ৩০০ কৰ্মকৰ্তাই প্ৰতিযোগিতাখন পৰিচালিত কৰিব। থকাৰ সু-ব্যৱস্থা কৰা হৈছে ৷
উদ্বোধনী অনুষ্ঠানত বোকাখাতৰ শিল্পী ৰত্নেশ্বৰ মৰাঙৰ পৰিচালনাত এটি সমবেত গীত আৰু প্ৰতিযোগীতাৰ লগত সংগতি ৰাখি নক্ষত্ৰ নামৰ এখন স্মৃতিগ্ৰন্থও উন্মোচন কৰা হ’ব বুলি সংবাদমেলত অৱগত কৰে আয়োজক সমিতিয়ে।
প্ৰতিযোগিতাৰ বাবে প্ৰায় ২৮ লাখ টকাৰ এখন বাজেট প্ৰস্তুত কৰিছে আয়োজক সমিতিয়ে আৰু ইয়াৰে নুমলীগড় শোধনাগাৰে ৩ লাখ টকাৰ অনুদান দিয়াৰ প্ৰতিশ্ৰুতিও দিছে।
সংবাদ মেলত আয়োজক সমিতিৰ সাধাৰণ সম্পাদক সুবোধ বৰা, জিলা সন্থাৰ সভাপতি ৰেবকান্ত হাজৰিকা, সাধাৰণ সম্পাদক দ্বীপেন শইকীয়া আৰু উপদেষ্টা কেশৱ উপাধ্যায় উপস্থিত থাকে।
