নিট প্ৰতিবাদকাৰীৰ বিৰুদ্ধে ৰুজু হোৱা সকলো গোচৰ প্ৰত্যাহাৰৰ সিদ্ধান্ত অসম চৰকাৰৰ
নিট (ইউজি) পৰীক্ষাৰ অনিয়মৰ বিৰুদ্ধে দেশৰ ৰাজধানীৰ লগতে বিভিন্ন ৰাজ্যকত ছাত্ৰ ছাত্ৰীসকলে প্ৰতিবাদী কাৰ্যসূচী গ্ৰহণ কৰিছিল। অসমত এই প্ৰতিবাদৰ সৈতে জড়িতসকলৰ বিৰুদ্ধে তৰা সকলো আৰক্ষী গোচৰ প্ৰত্যাহাৰ কৰাৰ লগতে গ্ৰেপ্তাৰ হোৱা লোকসকলক মুকলি কৰি দিয়াৰ প্ৰক্ৰিয়া আৰম্ভ কৰাৰ সিদ্ধান্ত গ্ৰহণ কৰিছে অসম চৰকাৰে।
এক চৰকাৰী সিদ্ধান্ত অনুসৰি, ২০২৬ চনৰ ২৬ জুলাইৰ বিয়লি ৬ বজালৈকে সমগ্ৰ অসমত এই প্ৰতিবাদৰ সৈতে জড়িত পাঁচটা গোচৰ পঞ্জীয়ন কৰা হৈছিল আৰু ইয়াৰ ভিত্তিত মুঠ ১৩ জন ব্যক্তিক গ্ৰেপ্তাৰ কৰা হৈছিল। প্ৰতিবাদৰ কাৰণসমূহ পৰ্যালোচনা কৰাৰ পাছত আৰু পৰীক্ষা তথা উচ্চ শিক্ষা ব্যৱস্থাত দায়বদ্ধতা বৃদ্ধি আৰু গাঁথনিগত সংস্কাৰ সাধনৰ প্ৰয়োজনীয়তাৰ প্ৰতি লক্ষ্য ৰাখি, আন্দোলনকাৰীসকলৰ বিৰুদ্ধে পৰৱৰ্তী আইনী ব্যৱস্থা গ্ৰহণ নকৰিবলৈ ৰাজ্য চৰকাৰে সংকল্প লৈছে।
এই সিদ্ধান্তৰ অধীনত, প্ৰতিবাদত অংশগ্ৰহণ কৰা ব্যক্তিৰ বিৰুদ্ধে অসমৰ কোনো আৰক্ষী কৰ্তৃপক্ষই প্ৰতিকূল আইনী ব্যৱস্থা গ্ৰহণ নকৰিব। আইনী প্ৰক্ৰিয়া যি পৰ্যায়তেই নাথাকক কিয়, পঞ্জীয়নভুক্ত সকলো গোচৰ আইন অনুসৰি অতি শীঘ্ৰে প্ৰত্যাহাৰ কৰাৰ প্ৰক্ৰিয়া আৰম্ভ কৰিবলৈ চৰকাৰে নিৰ্দেশ দিছে। চৰকাৰে লগতে স্পষ্ট কৰিছে যে ৰুজু হোৱা পাঁচটা গোচৰৰ ভিত্তিত কৰা গ্ৰেপ্তাৰ আৰু আটকৰ বিষয়টো পুনৰীক্ষণ কৰা হ’ব আৰু গ্ৰেপ্তাৰ হোৱা লোকসকলক **ক্ষিপ্ৰতাৰে** মুকলি কৰি দিয়াৰ ব্যৱস্থা কৰা হ’ব।
ইয়াৰ উপৰিও, প্ৰতিবাদত জড়িত ব্যক্তিৰ বিৰুদ্ধে ভৱিষ্যতে কোনো ব্যৱস্থা গ্ৰহণ কৰাৰ পৰিকল্পনা চৰকাৰৰ নাই বুলি ৰাজ্যখনে স্পষ্ট কৰি দিছে। সমগ্ৰ বিষয়টো ইয়াতেই সামৰণি পেলোৱা হ’ব বুলি গণ্য কৰা হ’ব আৰু এই সন্দৰ্ভত ভৱিষ্যতে কোনো আইনী প্ৰক্ৰিয়া চলোৱা নহয়।
চৰকাৰৰ এই পদক্ষেপে নিট (ইউজি) প্ৰতিবাদৰ পৰা উদ্ভৱ হোৱা আইনী ব্যৱস্থাৰ অৱসান ঘটোৱাৰ লগতে পৰীক্ষা আৰু উচ্চ শিক্ষাৰ আন্তঃগাঁথনি শক্তিশালী কৰা তথা দায়বদ্ধতা বৃদ্ধি কৰাৰ স্বাৰ্থত বহল সংস্কাৰৰ প্ৰতি চৰকাৰৰ লক্ষ্যক প্ৰতিফলিত কৰিছে।