প্ৰতীক হাজেলাক বদলিৰ নিৰ্দেশক আমছুৰ আদৰণি, কিন্তু….

সদৌ অসম সংখ্যালঘু ছাত্ৰ সন্থাই এন আৰ চিৰ ৰাজ্যিক সমন্বয়ক প্ৰতীক হাজেলাক বদলিৰ বাবে ভাৰতৰ উচ্চতম ন্যায়ালয়ে দিয়া নিৰ্দেশক আদৰণি জনাইছে, কিন্তু আন কিছু মতো ব্যক্ত কৰিছে।

হাজেলাক সমগ্ৰ এন আৰ চি প্ৰক্ৰি্য়াটোৰ মূল ব্যক্তি হিচাপে অভিহিত কৰি আমছুৱে তেওঁৰ বদলিয়ে প্ৰক্ৰিয়াটোলৈ স্থৱিৰতা আনিব পাৰে বুলি আশংকা প্ৰকাশ কৰিছে।

“ইমান বৃহৎ আৰু জটিল প্ৰক্ৰিয়া এটি সমাপ্ত হোৱাৰ দিশত আগবঢ়াৰ সময়ত প্ৰক্ৰিয়াটোৰ মূল ব্যক্তিজনক বদলি কৰাত আমি আচৰিত হৈছো। যিজন ব্যক্তিৰ নখ দৰ্পনত সমগ্ৰ বিষয়টি আছে, তেওঁৰ অনুপস্থিতিত সমগ্ৰ প্ৰক্ৰিয়াটোতে স্থৱিৰতা যে নাহিব তাক নুই কৰিব নোৱাৰি,” আমছুৱে কয়।

সৰ্বোচ্চ ন্যায়ালয়ে সঠিকভাবে প্ৰক্ৰিয়াটো কোনো প্ৰকাৰৰ স্থৱিৰতা নোহোৱাকৈ আগবঢ়াই সমাপ্ত কৰিব বুলি সংগঠনটোৱে আশা প্ৰকাশ কৰিছে।

হাজেলাক উচ্চতম ন্যায়ালয়ে বদলি কৰা সন্দৰ্ভত তথা ইয়াৰ অন্তৰালৰ নিৰ্দিষ্ট “কাৰণ”ক লৈ অসমত বিভিন্নজনে প্ৰতিক্ৰিয়া প্ৰকাশ কৰি আছে যদিও উচ্চতম ন্যায়ালয়ে তেওঁক বদলিৰ কোনো “কাৰণ” ঘোষণা কৰা নাই।

হাজেলাৰ বদলি “শাস্তিমূলক” বা “নিৰাপত্তাজনিত” বা আন কিবা— এনে ধৰণৰ কোনো মৌখিক বা লিখিত বিবৃতি শুকুৰবাৰৰ শুনানিত নাছিল।

“UPON hearing the counsel the Court made the following

O R D E R

Upon hearing Mr. Prateek Hajela, learned State Coordinator, the learned Attorney General and the learned Solicitor General and taking into account the totality of the facts of the case, we order for the inter-cadre transfer of Mr. Hajela to the State of Madhya Pradesh on deputation for the maximum period permissible under the relevant rules/regulations. The notification consequent to the above direction will be issued by the competent authority of the Union of India/State Government forthwith and in any case within seven days from today.All other issues/matters listed for consideration will now come up before the Court on 26.11.2019.”: এইটো অসমৰ এন আৰ চিজনিত লেখ আবেদন (নং WP(C) 274/2009) সন্দৰ্ভত শুকুৰবাৰে হোৱা শুনানিৰ পিছত দিয়া সম্পূৰ্ণ নিৰ্দেশটো।

হাজেলাক বদলিৰ কাৰণ জানিব খোজা দেশৰ এটৰ্নি জেনেৰেল ৱেনু গোপালক মুখ্য ন্যায়াধীশ গগৈয়ে কেৱল কৈছে যে কাৰণ নোহোৱাকৈ কোনো নিৰ্দেশ দিয়া নাযায়।

আনহাতে, শুদ্ধ নথি জমা দিয়াৰ পিছতো এন আৰ চিত নাম অন্তৰ্ভুক্ত নোহোৱাসকলক সংগঠনটোৱে ন্যায়ৰ বাবে অপেক্ষা কৰিবলৈ আহ্বান জনাইছে।

“…সকলোৱে উচ্চতম ন্যায়ালয়ৰ পৰা সঠিক ন্যায় পাব বুলি আমি আশাবাদী। পৰৱৰ্তী শুনানিলৈ সকলো পক্ষকে ধৈৰ্য্যসহকাৰে অপেক্ষা কৰিবলৈ আহ্বান জনালো,” আমছুৰ বিবৃতিত প্ৰকাশ।

শুকুৰবাৰৰ শুনানিটো যোৱা ৩১ আগষ্টত অসমৰ এন আৰ চিৰ চূড়ান্ত তালিকা প্ৰকাশ পোৱাৰ পিছৰ প্ৰথমটো শুনানি আছিল।

তাৰোপৰি, ই হ’ব এন আৰ চিক লৈ অসম-সন্তান মুখ্য ন্যায়াধীশ ৰঞ্জন গগৈৰ অন্তিমটো শুনানি।

অহা ২৬ নৱেম্বৰক শুনানিৰ পৰৱৰ্তী দিনৰূপে থিৰাং কৰা হৈছে, কিন্তু তাৰ পূৰ্বেই মুখ্য ন্যায়াধীশ গগৈয়ে অৱসৰ গ্ৰহণ কৰিব।

তাৰোপৰি, পূৰ্বৰ দৰে দুজন বিচাৰপতিৰ বিপৰীতে শুকুৰবাৰৰ শুনানি তিনিগৰাকীয়ে গ্ৰহণ কৰে।

মুখ্য ন্যায়াধীশ গগৈ আৰু ন্যায়াধীশ ৰহিন্তন ফলি নৰিমনৰ উপৰি ন্যায়াধীশ এছ এ ববদেও শুনানিত উপস্থিত আছিল।

এন আৰ চিজনিত পৰৱৰ্তী শুনানিসমূহ ন্যায়াধীশদ্বয় এছ এ ববদে, আৰ এফ নৰিমনে গ্ৰহণ কৰিব।