সুস্থ গণতন্ত্ৰৰ বাবে নিকা নিৰ্বাচন অনুষ্ঠিত কৰাত গুৰুত্বপূৰ্ণ ভূমিকা লোৱা অসম আৰক্ষীৰ চিপাহীসকলৰ প্ৰতি চৰকাৰৰ দায়িত্বহীনতা আৰু অসন্মানৰ মনোভাব উদঙাই দিয়া কেইটামান ফেইচবুক পোষ্টে ছ’চিয়েল মিডিয়াত একপ্ৰকাৰৰ তোলপাৰ লগাইছে।
এই পোষ্টকেইটাত আৰক্ষী চিপাহীসকলৰ নিম্নতম মানৱীয় অধিকাৰৰ প্ৰতি কেনেকৈ অবিচাৰ কৰা হৈছে সেয়া লাজ লগাকৈ উদং খাইছে।
পোষ্টকেইটাৰ সৈতে দিয়া ফটোবোৰত দেখা গৈছে নিৰ্বাচনৰ দায়িত্বত বিভিন্ন ঠাইলৈ অস্থায়ীভাৱে পঠিওৱা আৰক্ষী জোৱানসকলক তেওঁলোকৰ বাবে প্ৰয়োজনীয় নিম্নতম সা-সুবিধা নথকা আৰু কদৰ্য্যময় পৰিৱেশত থাকিবলৈ দিয়া হৈছে। বোকা-পানীৰ মাজতে তেওঁলোকে খোৱা-শোৱা সকলো কৰিব লগীয়া হৈছে।
হোজাইত নিৰ্বাচনৰ নিৰাপত্তাৰ দায়িত্বৰ বাবে যোৱা এজন কনিষ্টবলে তেওঁৰ ফেইচবুক পোষ্টটোত লিখিছে, “হোজাইত ইলেকশ্যনৰ ডিউটিৰ বাবে আহিছো… কিন্তু এনেদৰে থাকিব পাৰি জানো… চৌদিশে বোকাপানী… কি জঘন্য পৰিৱেশ… আমিও একো একোজন মানুহ…” ইত্যাদি। পোষ্টটোৰ সৈতে তেওঁ থকা ঠাইৰ চূডান্ত অস্বাস্থ্যকৰ পৰিৱেশৰ একাধিক ফটোও দিয়ে।
একেদৰে শিলচৰৰ পৰা এজন জোৱানে কেইবাখন ফোটগ্ৰাফৰ সৈতে দিয়া পোষ্টটোত লিখিছে, “নিৰ্বাচনত নিয়োজিত আৰক্ষী সকল মানুহ নহয় নেকি। বৰ্তমান সময়ত শিলচৰত জোৱান সকলৰ অৱস্থা চাওক। শিলচৰ প্ৰশাসনে সুপৰিকল্পিত ব্যৱস্থা নকৰা কাৰণে এনে দুৰ্ভোগ ভুগিব লগা হৈছে নে নিৰ্বাচন আয়োগৰ কাৰণে। এজাক বৰষুণত কাপোৰ কানিকে ধৰি থাকিব দিয়া ঠাই অৱস্থা চাওক।”
পোষ্টটোৰ লগত দিয়া ফটোগ্ৰাফকেইখনৰ পৰাও আৰক্ষীৰ জোৱানসকলৰ দুৰ্দশা প্ৰকট হৈ উঠিছে।
নিৰ্বাচনৰ উপৰি, মন্ত্ৰী, বিধায়কসকলৰো জীৱনৰ নিৰাপত্তাৰ দায়িত্ব কান্ধ পাতি লোৱা আৰক্ষী জোৱানসকলৰ নিম্নতম মানৱীয় মৰ্য্যাদা, অধিকাৰৰ প্ৰতি চৰকাৰৰ এনে অৱহেলা আৰু অসন্মান উন্মোচিত হৈ পৰাৰ পিছত চৌদিশে সমালোচনা কৰা দেখা গৈছে।
পোষ্টকেইটাই তাত্ক্ষণিকভাৱে মানুহৰ ক্ষোভৰ উদগিৰণ কৰাৰ লগতে কেইবা ঠাইৰো বহুতো আৰক্ষী জোৱানে সঁহাৰি দি কয়, তেওঁলোকো একেই অৱহেলা আৰু দুৰ্দশাৰ বলি। তেওঁলোকো একেই পৰিস্থিতিত থাকিব লগীয়া হৈছে। “খালী শিলচৰ নহয়, অল আছাম, য’ত থাকিব দিয়ে, চব ঠাই এনেকুৱা হয়’”, ভুক্তভোগী এজন জোৱানে পোষ্টটোৰ প্ৰতি সঁহাৰি দি কয়।
অত্যন্ত দুখেৰে এজনে comment -অত লিখিছে, “কি কৰিবি বন্ধু আমি যে কনিষ্টবল!”
‘‘সিহঁতে এ চি ৰূমত থাকিব পায় যে, চিপাহী মৰি যাওক সিহঁতক ডিউটি লাগে মাত্ৰ”, আন এজনৰ ক্ষোভভৰা কমেণ্ট।
‘‘দুখ লগা ছবি”, দীপ মৌচম নামৰ এজন।
‘‘অসম আৰক্ষীৰ আধুনিকীকৰণ জীয়া বাস্তৱ ছবি। নিজৰ মানুহৰ সমস্যা সমাধান কৰিব নোৱৰা বিয়াগোম বিভাগটো পৰা জনসাধাৰণ কি কৰিব সেইটো নক’লেও হ’ব। নিৰ্বাচনৰ নামত কৰ্ত্তব্য বাৰে নিয়োজিত কৰি গৰু গোহালি দৰে ঠাইত খাবলৈ শুবলৈ দিয়া সমস্যা বোৰ আমাৰ নিৰ্লজ্জ বিভাগটোবে কাহিনীও সমাধান কৰিব নোৱাৰে’’, জগত বুঢ়াগোহাঁই নামৰ এজনে কয়।
‘‘ইছিকো অচ্ছে দিন বোলতে হ্যেঁ’’, বিজেপিৰ অচ্ছে দিনক কটাক্ষ কৰি এজনে কয়।
নীল প্ৰীতম দত্ত নামৰ এজনে কয়, ‘‘লাখ লাখ টকা খৰচ কৰি নিৰ্বাচন পাতিব টকা ওলায়। হেলিকপ্টাৰত উঠি কোটি টকাৰ খৰচ কৰি নিৰ্বাচনৰ প্ৰচাৰ চলাব টকা ওলায়। 5 ষ্টাৰ হোটেলত থাকিব পাৰে এই সকল আমাৰ চতুৰ ৰাজনৈতিক নেতাই… কিন্তু …কিন্তু… গণতন্ত্ৰৰ ৰক্ষা কৰাৰ স্বাৰ্থত দিন ৰাতি একাকাৰ কৰা আমাৰ আৰক্ষী জোৱান সকলক সাধাৰণ থকা খোৱাৰ ব্যৱস্থা কৰিব নোৱাৰাতো অকল লজ্জাজনক নহয় ধিক্কাৰ জনক ।। হায় মতলবী চৰকাৰ ।।।
এই বিষয়ে লিখিলে দেশদ্ৰোহী হওঁ আমি ।। ভৱিষ্যতে আৰক্ষী সকলৰ এই বোৰ অসুবিধা নহয় যাতে তাৰ ওপৰত চকু দিব অনুৰোধ জনালোঁ এজন খাটি খোৱা অসমীয়া হিচাবে ।
কাৰণ এই সকল জোৱান আমাৰ ভাই হয়।
জয় আই অসম।।’’
উল্লেখযোগ্য যে শিলচৰত যোৱা ১৫ এপ্ৰিলত ধুমুহাত আৰক্ষীৰ এটা অস্থায়ী শিবিৰ নিমিষতে ভাগি পৰাত কেইবাজনো জোৱানৰ কথমপি প্ৰাণ ৰক্ষা পৰিছিল। তেওঁলোকৰ নথি-পত্ৰ, কাপোৰকানি সকলো আলৈ-আথানি হৈছিল। শিবিৰটো অতি নিম্নমানৰ সামগ্ৰীৰে নিৰ্মাণ কৰাৰ অভিযোগ উঠিছিল।
আনহাতে কিছুদিনৰ পূৰ্বে এজন ট্ৰেফিক আৰক্ষী জোৱানে বতাহ-ধুমুহাতে থিয় হৈ বশিষ্ট চাৰি আলিৰ অতি ব্যস্ত ট্ৰেফিক পইণ্টৰ উন্মুক্ত পেভিলয়নত ডিউটি কৰিছিল, যিটো ঘটনায়ো বিভাগটোৰ দায়িত্বহীনতাক উদঙাই দিছিল।
লগতে পঢ়ক ধুমুহা-বৰষুণতো কৰ্তব্য পালন কৰা জোৱান মিঠুন দাসক সম্বৰ্ধনা আৰক্ষী আয়ুক্ত দীপক কুমাৰৰ
সমগ্ৰ ভাৰতীয় মানুহৰ মানুহৰ মনৰ পৰা বি এছ এফ জোৱান তেজ বাহাদুৰ যাদৱৰ কাহিনী এতিয়াও মাৰ যোৱা নাই, যিজনে ছ’চিয়েল মিডিয়াত এৰি দিয়া এটা ভিডিঅ’ৰ যোগে মোদী চৰকাৰখনৰ ‘ভ্ৰষ্টাচাৰমুক্ত ভাৰত’ শ্ল’গানৰ নগ্ন ৰূপ দেখুৱাই দিছিল। তেওঁ ভিডিঅ’টোত বি এছ এফৰ জোৱানসকলক দিয়া অতি নিম্ন মানৰ খাদ্য দিয়া হয়, আৰু তেওঁলোকৰ বাবে অনুমোদিত খাদ্য বাহিৰত বিক্ৰী কৰা হয় বুলি দাবী কৰিছিল। অভিযোগ মতে, তেজ বাহাদুৰক পিছত চৰকাৰ আৰু বিভাগটোৰ স্বৰূপ উদঙাই দিয়া বাবে বি এছ এফে মানসিক-শাৰীৰিক অত্যাচাৰ কৰিছিল। তেওঁৰ বিৰুদ্ধে গোচৰো জাপি দিয়া হৈছিল।
অসম আৰক্ষীৰ চিপাহীকেইজনৰ বিকাশ আৰু পৰিৱৰ্তনৰ শ্ল’গান দিয়া চৰকাৰৰ স্বৰূপ উদঙাই দিয়া এই দুঃসাহসৰ পৰিণাম কি হয় সেয় এতিয়াও জানিব পৰা হোৱা নাই। তেওঁলোকৰ শিবিৰবোৰৰ পৰিৱেশ উন্নত হয় নে অসমেও আন কেইজনমান তেজ বাহাদুৰ যাদৱ দেখিবলৈ পাব সেয়া সময়ে ক’ব।
