ৰেৱতী ফুকনৰ সন্ধান উলিওৱাত ব্যৰ্থ আৰক্ষী : সদনত গৃহ বিভাগৰ উত্তৰত অসন্তুষ্ট বিজেপি বিধায়ক
বিশিষ্ট ফুটবল খেলুৱৈ, অধুনালুপ্ত পি চি জিৰ সদস্য ৰেৱতী ফুকনৰ নিৰুদ্দেশ সন্দৰ্ভত বিধানসভাৰ মজিয়াত বিজেপিৰ বিধায়ক ঋতুপৰ্ণ বৰুৱাই সোমবাৰে উত্থাপন কৰা এটা প্ৰশ্নৰ গৃহ বিভাগে দিয়া উত্তৰত বিধায়কগৰাকী সন্তুষ্ট নহ’ল। গৃহ বিভাগৰ উত্তৰত অসন্তুষ্ট বিজেপিৰ বিধায়কজনে সদনৰ বাহিৰত সাংবাদিকৰ আগত ৰেৱতী ফুকনৰ সন্ধান উলিওৱাত অসম আৰক্ষী ব্যৰ্থ হোৱা বুলি ক্ষোভ ব্যক্ত কৰে।
বিধায়ক বৰুৱাৰ তৰাবিহীন প্ৰশ্নৰ বিপৰীতে গৃহ বিভাগে এক হতাশাজনক উত্তৰ দিয়ে। গৃহ বিভাগৰ দায়িত্বত থকা মুখ্যমন্ত্ৰী সৰ্বানন্দ সোণোৱালৰ হৈ সদনত সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে উত্তৰ দিয়ে।
তেওঁ সদনত কয় যে বৰ্তমানলৈকে ৰেৱতী ফুকনৰ কোনো সন্ধান পোৱা নাই। চৰকাৰে আইনমতে সকলো ব্যৱস্থা হৈছে। অৰ্থাৎ ৰেৱতী ফুকন সন্ধানহীন সন্দৰ্ভত ৰাজ্য চৰকাৰৰ হাতত কোনো নিৰ্ভৰযোগ্য তথ্য নাই।
বিধায়কগৰাকীৰ প্ৰশ্নৰ উত্তৰত গৃহ বিভাগে কয় যে তদন্তৰ গতি ক্ষিপ্ৰতৰ কৰাৰ বাবে আৰক্ষীয়ে তদন্তকাৰী গোট গঠন কৰিছে। নিৰুদ্দিষ্ট ব্যক্তিজনৰ ফটোগ্ৰাফ বাতৰিকাকত আৰু দূৰদৰ্শনৰ যোগেদি সম্প্ৰচাৰ কৰা হৈছে। এইক্ষেত্ৰত দেশৰ সকলো ৰাজ্যৰ ডি জি পিৰ সৈতে যোগাযোগ কৰা হৈছে। ক্ৰিমিনেল ইণ্টেলিজেন্স গেজেটৰ যোগেৰেও প্ৰচাৰ চলোৱা হৈছে।
আনহাতে, ৰেৱতী ফুকনক উদ্ধাৰৰ বাবে কেন্দ্ৰীয় চৰকাৰৰ বিভিন্ন সংস্থাৰ সৈতে যোগাযোগ কৰা হৈছে নেকি বুলি বিধায়ক বৰুৱাই সোধা প্ৰশ্নৰ উত্তৰত গৃহ বিভাগে কয় যে অধিক তথ্য আহৰণৰ বাবে কেন্দ্ৰীয় চৰকাৰৰ বিভিন্ন সংস্থাৰ সৈতে যোগাযোগ কৰা হৈছে।
ইপিনে সদনৰ বাহিৰত বিধায়ক বৰুৱাই কেন্দ্ৰীয় চৰকাৰৰ চোৰাংচোৱা সংস্থাই ফুকনৰ অপহৰণ কৰি অজ্ঞাত স্থানত লুকুৱাই ৰখাৰ সন্দেহ ব্যক্ত কৰিছে।