মঙ্গলবাৰে ৰাজীৱ ভৱনত হোৱা এক সংবাদমেলত অসম প্ৰদেশ কংগ্ৰেছৰ উপ সভাপতি তথা প্ৰাক্তন সাংসদ দ্বীজেন শৰ্মাই আগন্তুক উপ-নিৰ্বাচনৰ প্ৰাৰ্থীৰ তালিকা ঘোষণা কৰাৰ লগতে প্ৰিয়ংকা গান্ধীক উত্তৰ প্ৰদেশৰ আৰক্ষীয়ে অন্যায় ভাবে আটক কৰাকলৈ তীব্ৰ গৰিহণা দিয়ে।
এই সন্দৰ্ভত তেওঁ কয় “কেইদিনমান আগতে উত্তৰ প্ৰদেশৰ লক্ষীমপুৰ খেৰীৰ এক কৃষকৰ প্ৰতিবাদী কাৰ্য্যসূচীত কেন্দ্ৰীয় মন্ত্ৰী এজনৰ পুত্ৰই গাড়ীৰে চলাই ৬ গৰাকী কৃষকক মহতিয়াই হত্যা কৰা কাৰ্য্যক অসম প্ৰদেশ কংগ্ৰেছ কমিটিয়ে গৰিহনা দিয়ে
উক্ত ঘটনাৰ ভুক্তভোগী আৰু ঘটনাটোৰ বুজ লোৱাৰ উদ্দেশ্যেৰে সেই ঠাইত উপস্থিত হ’বলৈ যোৱাৰ পথত নিখিল ভাৰত কংগ্ৰেছ কমিটিৰ মাননীয়া সাধাৰণ সম্পাদিকা প্ৰিয়ঙ্কা গান্ধীক উত্তৰ প্ৰদেশ আৰক্ষীয়ে অন্যায় ভাৱে আটক কৰাৰ লগতে অপদস্থ কৰাৰ চেষ্টা কৰা ঘটনাক প্ৰদেশ কংগ্ৰেছে তীব্ৰ গৰিহণা দিয়ে।”
তেওঁ কয়, “এটা সময়ত অটল বিহাৰী বাজপে বিৰোধী দলৰ দলপতি থকা সময়ত কংগ্ৰেছে তেখেতক যথেষ্ট সন্মান দিছিল, কিন্তু আজি বিৰোধীক অপমান আৰু অপদষ্ঠ কৰি এই চৰকাৰে গণতন্ত্ৰক হত্যা কৰিব খুজিছে।”
তদুপৰি মহানগৰীৰ ৰুক্মিণীনগৰত শনিবাৰে নিশা সংঘটিত ‘ড্ৰিংক এণ্ড ৰান’ ঘটনা সন্দৰ্ভত দ্বীজেন শৰ্মাই কয়, “ঠিক তেনেকৈয়ে অসমত ৰাজকন্যা বৰুৱা নামৰ এগৰাকী মহিলাই নিশা সুৰামত্ত অৱস্হাত গাড়ী চলাই নজন কৰ্তব্যৰত শ্ৰমিকক মহতিয়াই লৈ যায়, যাৰ ফলত এজন বণুৱা শ্ৰমিকে দুয়োখন ভৰিয়েই হেৰুৱাব লগীয়া হয়।
ৰাজকন্যা বৰুৱা ইমানেই প্ৰভাৱশালী যে তেওঁ পিছদিনাই জামিনত মুক্তি লাভ কৰিবলৈ সক্ষম হয়। পুলিছৰ সহযোগিতাত দুৰ্বল কেছ ডায়েৰী দিয়া কাৰণে এনে ঘটনা হবলৈ পালে।
যি সকল আৰক্ষী এই ঘটনাৰ লগত জড়িত আছে, তেওঁলোকক দৃষ্টান্তমূলক শাস্তি প্ৰদান কৰি নজন শ্ৰমিকক সোনকালে যথোপযুক্ত ক্ষতি পূৰণ দিয়াৰ লগতে উক্ত ঘটনাত দুইখন ভৰিয়ে হেৰুৱাব লগীয়া হোৱা শ্ৰমিকজনক কৃত্ৰিম ভৰি লগোৱাৰ ব্যৱস্হা কৰাৰ বাবে প্ৰদেশ কংগ্ৰেছে দাবী জনাইছে।”
