অসম ৰাইফলছ আৰু কাকচিং আৰক্ষীৰ যুটীয়া অভিযানত ৭ ডিচেম্বৰত মণিপুৰৰ কাকচিং জিলাৰ পাল্লেলত ৫৭ লাখ টকাৰ অবৈধ ড্ৰাগছ জব্দ কৰা হয়।
বিশষ সূত্ৰৰ পৰা লাভ কৰা তথ্যৰ ভিত্তিত অসম ৰাইফলছ আৰু কাকচিং আৰক্ষীয়ে ১০২ নং ৰাষ্ট্ৰীয় ঘাইপথত পহৰা চকী স্থাপন কৰে আৰু যান-বাহনত তালাচী আৰম্ভ কৰে।
অসম ৰাইফল আৰু কাকচিং আৰক্ষীৰ তালাচীৰ সময়ত এখন অট’ ৰিক্সাত উঠি অহা এগৰাকী মহিলাৰ বেগৰ পৰা ১৪২.৬৭ গ্ৰাম ওজনৰ হেৰোইন জব্দ কৰিবলৈ সক্ষম হয় অভিযানকাৰী দলটোৱে।
মহিলাগৰাকীয়ে চাবনৰ বাকচত নিষিদ্ধ হেৰোইনখিনি লুকুৱাই আনিছিল।
আৰক্ষী সূত্ৰত প্ৰকাশ কৰা মতে, উদ্ধাৰ হোৱা হেৰোইন খিনিৰ বজাৰ মূল্য প্ৰায় ৫৭ লাখ টকা হ’ব।
নিষিদ্ধ ড্ৰাগছখিনি কঢ়িয়াই অনা মহিলাগৰাকীক চান্দেল জিলাৰ মহামনি গাঁৱৰ আৰ ডি ৰোশ্নি আনাল বুলি চিনাক্ত কৰা হৈছে।
উদ্ধাৰহোৱা ড্ৰাগছখিনিৰ লগতে আটকাধীন মহিলাগৰাকীক অধিক জেৰাৰ বাবে কাকচিং আৰক্ষীৰ থানাত ৰখা হৈছে।
মহিলাগৰাকীয়ে ইয়াৰ পূৰ্বেও অঞ্চলটোৰ বিভিন্ন ড্ৰাগছ সৰবৰাহকাৰী চক্ৰৰ সৈতে জড়িত হৈ আছিল বুলি জানিব পৰা গৈছে।
