অৰুণাচল প্ৰদেশৰ টিৰাপ জিলাৰ চানলিয়াম গাঁৱত আজি দিনৰ ভাগত সন্দেহযুক্ত এনএছচিএন (আই এম) বিদ্ৰোহীৰ এটা ১৫/২০ জনীয়া দলে আসাম ৰাইফলছৰ এটা তহলদাৰী দলৰ ওপৰত অতৰ্কিতে গুলী বৰ্ষণ কৰাত এজন আসাম ৰাইফলছৰ জোৱান নিহত হোৱাৰ বাতৰি পোৱা গৈছে।
অৱশ্যে বাতৰি লেখা সময়লৈকে নিহত সেনা জোৱান জনৰ নাম জানিব পৰা হোৱা নাই।
এই ঘটনাৰ পাছতেই নিৰাপত্তা বাহিনীয়ে অঞ্চলটোত উগ্ৰপন্থী বিৰোধী অভিযান তীব্ৰতৰ কৰি তুলিছে। এই অভিযান কালত নিৰাপত্তা বাহিনীয়ে হেলিকপ্টাৰো ব্যৱহাৰ কৰা বুলি জানিব পৰা গৈছে।
উল্লেখযোগ্য যে অৰুণাচল প্ৰদেশৰ টিৰাপ জিলাত শেহতীয়াকৈ উগ্ৰপন্থীৰ কাৰ্যকলাপ বৃদ্ধি পোৱা পৰিলক্ষিত হৈছে।
২০১৯ চনৰ ২১ মে’ত জিলাখনৰ বগাপানী অঞ্চলত টিৰাপৰ বিধায়ক টিৰং আব’ আৰু তেখেতৰ পুত্ৰসহ মুঠ ১১ জন লোকক সন্দেহযুক্ত উগ্ৰপন্থীয়ে গুলীয়াই হত্যা কৰিছিল। এই ঘটনা এনএছচিএন (আই এম) উগ্ৰপন্থীয়ে সংঘটিত কৰা বুলি তদন্তকাৰী সংস্থা এনআইএ-এ সদৰি কৰিছে।
তদন্তকাৰী সংস্থাটোৱে ইতিমধ্যে এই ঘটনাত জড়িত চাৰিগৰাকী এনএছচিএন সদস্যৰ বিৰুদ্ধে চাৰ্জশ্বীট দাখিল কৰিছে।
