জাপানীজ এনকেফেলাইটিছৰ সংহাৰী ৰূপ; একেটা দিনতে ১৬জন ব্যক্তিৰ মৃত্যু
ৰাজ্যত প্ৰলয়ংকাৰী বানৰ বিভীষিকাময় পৰিস্থিতিৰ সমান্তৰালভাৱে জাপানীজ এনকেফেলাইটিছ ৰোগে বৰ্তমান সংহাৰী ৰূপ ধাৰণ কৰিছে। কালিৰ দিনটোতে ৰাজ্যৰ বিভিন্ন স্থানত জাপানিজ এনকেফেলাইটিছ আৰু একিউ এনকেফেলাইটিছত ১৬জন লোকৰ মৃত্যু হৈছে।
ইয়াৰ ভিতৰত জাপানিজ এনকেফেলাইটিছত ৬জন আৰু একিউ এনকেফেলাইটিছসদৃশ ৰোগত ১০জন লোকে প্ৰাণ হেৰুৱায়। চৰকাৰী হিচাপ মতে কালি পৰ্যন্ত ইয়াৰ ফলত ৰাজ্যত ২৭৪ গৰাকী ব্যক্তিয়ে মৃত্যুক সাবটি লৈছে। আনহাতে দুয়োটা ৰোগত এতিয়ালৈকে আক্ৰান্ত হৈছে ১৪০৯ গৰাকী ব্যক্তি।
কিন্তু পৰিস্থিতিয়ে ইমান গুৰুতৰ ৰূপ লোৱাৰ পিছতো ৰাজ্য চৰকাৰ বা স্বাস্থ্য বিভাগে কোনোধৰণৰ বিশেষ তৎপৰতা দেখুৱা পৰিলক্ষিত হোৱা নাই। আনকি খোদ স্বাস্থ্য মন্ত্ৰী হিমন্ত বিশ্ব শৰ্মাই ৰাজ্যৰ চিকিৎসক, নাৰ্ছকে ধৰি সকলো চিকিৎসা কৰ্মীৰ ছুটী বাতিল কৰি বিদেশত গৈ ক্ৰিকেট বিশ্বকাপ উপভোগ কৰাত ব্যস্ত আছিল।
আনহাতে জানিব পৰা মতে উক্ত ৰোগৰ স্পৰ্শকাতৰ হিচাপে বিবেচিত বিভিন্ন অঞ্চলত এই পৰ্যন্ত জনস্বাস্থ্য কাৰিকৰী বিভাগে ৰোগ নিয়ন্ত্ৰণৰ বাবে ফ’গিং, ঔষধযুক্ত আঁঠুৱা বিতৰণ আদি কোনো ব্যৱস্থা গ্ৰহণ কৰা নাই।
উল্লেখযোগ্য যে কালি জাপানিজ এনকেফেলাইটিছৰ ফলত মৃত্যু হোৱা ৰোগী সকল দৰং, লখিমপুৰ, যোৰহাট, বৰপেটা, হাইলাকান্দি. তিনিচুকীয়া আদি জিলাকেইখনৰ বিভিন্ন চিকিৎসালয়য় আই চি ইউত ভৰ্তি হৈ আছিল।