চৰকাৰী ফাইলতে আৱদ্ধ হৈ আছে জলবায়ু পৰিবৰ্তনৰ লগত মোকাবিলা কৰাৰ বাবে চাৰি বছৰ পূৰ্বে ৰাজ্যত প্ৰস্তুত কৰা আছাম ষ্টেট একচন প্লেন অন ক্লাইমেট চেঞ্জ চমুকৈ এছ এ পি চি চি শীৰ্ষক জলবায়ু পৰিৱৰ্তন সম্পৰ্কীয় একচন প্লেন।
উল্লেখ্য যে ২০০৮ চনৰ পৰা ২০১৫ চনলৈ ৭ বছৰজোৰা অধ্যয়ন আৰু গৱেষণাৰে ভাৰত চৰকাৰৰ পৰিৱেশ, বন আৰু জলবায়ু পৰিৱৰ্তন মন্ত্ৰ্যালয় আৰু ইংলেণ্ডৰ ডিপাৰমেন্ট ফৰ ইন্টাৰনেল ডেভেলাপমেন্ট চমুকৈ ডি এফ আই ডি য়ে প্ৰস্তুত কৰি ২০১৫ চনৰ ছেপ্টেম্বৰত ৰাজহুৱা কৰা এছ এ পি চি চি প্ৰতিবেদন শীৰ্ষক একচন প্লেনখন আজিলৈকে কাৰ্যকৰী হোৱা নাই।
ৰাজ্যৰ জলবায়ু সম্পৰ্কীয় একচন প্লেনখন পৰিচালনা কৰাৰ বাবে ৰাজ্য চৰকাৰে যোৱা বছৰত আছাম ক্লাইমেট চেঞ্জ মেনেজমেন্ট চ’চাইটি গঠন কৰিছে যদিও গ্ৰহণ কৰা হোৱা নাই কোনো কাৰ্যপ্ৰণালী।
এই সম্পৰ্কত বন বিভাগৰ (জৈৱ বৈচিত্ৰ আৰু জলবায়ু পৰিৱৰ্তন) প্ৰধান মুখ্য বন সংৰক্ষক এ কে জোহৰীয়ে কয় যে কিছুদিন পূৰ্বে চ’চাইটিৰ কাৰ্যনিৰ্বাহক কমিটীৰ প্ৰথমখন বৈঠক বহা হৈছে। তেওঁ কয় যে কেন্দ্ৰীয় চৰকাৰৰ নেচনেল ডিটাৰমাইন্ড কন্ট্ৰবিউছনৰ লক্ষ্যৰ ভিত্তিত ৰাজ্যৰ জলবায়ু সম্পৰ্কীয় শীৰ্ষক একচন প্লেনখন পুনৰীক্ষন কৰি কিছু নতুন বিষয় সন্নিবিষ্ট কৰাৰ কাম চলি আছে।
এই কামবোৰ হ’লে পৰ্যায়ক্ৰমে পৰিকল্পনা মতে কাৰ্যপন্থা হাতত লোৱা হ’ব। মন কৰিবলগীয়া যে, বন বিভাগ, কৃষি বিভাগ, জলসম্পদ বিভাগ, নগৰ উন্নয়ন বিভাগ আদি চৰকাৰী বিভাগকলৈ গঠন কৰা চ’চাইটিখনৰ বিষয়ে আৰু জলবায়ু সম্পৰ্কীয় শীৰ্ষক একচন প্লেনখনৰ বিষয়ে কৃষি বিভাগে হওঁক বা জলসম্পদ বিভাগে হওঁক কোনো এটা বিভাগৰ বিষয়াসকল অৱগত নহয়। সাধাৰণ মানুহে জনা দূৰৈৰ কথা।
জলবায়ু পৰিৱৰ্তন সম্পৰ্কীয় একচন প্লেনখন ২০২০চনক ভিত্তিবৰ্ষ হিচাপে লৈছিল। সেইমতে, কৃষি, জলসম্পদ, বিদ্যুৎ শক্তি, পৰিবহন, বন আৰু জৈৱ বৈচিত্ৰ্য আদি বিষয়ত নতুন ধৰণে কাম কৰাৰ বাবে একচন প্লেনখনত আঁচনি আৰু পৰিকল্পনা কৰা হৈছিল।
বিশেষকৈ কয়লা, পেট্ৰল, ডিজেল আদিৰ ব্যৱহাৰ হ্ৰাস কৰি সৌৰ শক্তিৰ ব্যৱহাৰ বৃদ্ধি কৰা, ব্যাপক বনানীকৰণ কৰা, কৃষি উৎপাদনত বিজ্ঞানসম্মত পদ্ধতি ব্যৱহাৰ কৰা আদি কেতবোৰ পৰিকল্পনা আৰু আঁচনি গ্ৰহণ কৰা হৈছিল। কিন্তু চৰকাৰৰ মন্ত্ৰী, আমোলাৰ অৱহেলাৰ বাবে এই পৰিকল্পনা ফাইলতে আৱদ্ধ হৈ আছে।
এই সম্পৰ্কত কটন বিশ্ববিদ্যালয়ৰ পদাৰ্থ বিজ্ঞান বিভাগৰ অধ্যাপক ৰাহুল মহন্তই কয় যে প্ৰতিবেদনখনত বিভিন্ন আসোঁৱাহ দেখা গৈছে। প্ৰতিবেদন প্ৰস্তুত কৰা সকলৰ জলবায়ু পৰিৱৰ্তন সম্পৰ্কত জ্ঞানৰ অভাৱ দেখা গৈছে।
ৰাজ্যখনৰ জলবায়ু পৰিৱৰ্তনৰ অধ্যয়নত সীমিত বৈজ্ঞানিক তথ্য ব্যৱহাৰ কৰাৰ লগতে জলবায়ু পৰিৱৰ্তনৰ লগত মোকাবিলা কৰাৰ প্ৰতিবেদনখনত যিধৰণৰ পৰিকল্পনা কৰিছে তাত বিজ্ঞানসম্মত জ্ঞানৰ অভাৱ দেখা গৈছে। সেয়েহে এইক্ষেত্ৰত যিবোৰ আঁচনি তথা নীতি প্ৰস্তুত কৰা হয় সেইবোৰ গতিশীল আৰু কাৰ্যক্ষম হোৱা প্ৰয়োজন।
