পঞ্চায়ত নিৰ্বাচন তথা লোকসভা নিৰ্বাচনৰ দিন ওচৰ চাপি অহাৰ লগে লগে যেন শংকিত হৈ পৰিছে ৰাজ্যিক বিজেপি। বিশেষকৈ কৃষক মুক্তিৰ নেতা অখিল গগৈৰ নেতৃত্বত গঢ়ি উঠা খিলঞ্জীয়া লোকৰ ঐক্যবদ্ধ আন্দোলনে বাৰুকৈয়ে শংকিত কৰিছে চৰকাৰৰ নেতৃত্ব দি থকা দলটোক। ফলত দেখা গৈছে এদিন এৰি এদিন দলৰ মুখপাত্ৰসকলৰ ইজনৰ পিছত সিজনে অখিল গগৈক বিষয় কৰি লৈ সংবাদমেল দিয়া অব্যাহত ৰাখিছে।
কেৱল অখিল গগৈকে নহয়, চৰকাৰখনক সৰব ৰূপত সমালোচনা কৰা বুদ্ধিজীৱীসকলকো বাৰেপতি আক্ৰমণৰ লক্ষ্য কৰি লোৱা দেখিবলৈ পোৱা গৈছে।
দুদিনমান পূৰ্বে বিজেপিৰ ৰাজ্যিক মুখপাত্ৰসকলৰ এজন মমিনুল আৱালে অখিল গগৈক ব্যক্তিগতভাৱে আক্ৰমণ কৰাৰ পাছতেই আজি পুনৰ সংবাদমেল অনুষ্ঠিত কৰি আন এজন ৰাজ্যিক মুখপাত্ৰ সুভাষ দত্তই সংবাদমেল দি অখিল গগৈক কটাক্ষ কৰে।
আজিৰ সংবাদমেলত বিজেপিৰ ৰাজ্যিক মুখপাত্ৰ সুভাষ দত্তই ‘অসমখন অশান্তময় কৰি ৰখাৰ বাবে কৃষক নেতা অখিল গগৈক কংগ্ৰেছে সাৰ-পানী যোগাইছে’ বুলিও তাৎপৰ্য্যপূৰ্ণ মন্তব্য কৰে।
নাগৰিকত্ব সংশোধনী বিধেয়কৰ বিৰুদ্ধে ব্যাপক জনসমৰ্থন লাভ কৰা অখিল গগৈক উদ্দেশ্যিক দত্তই কয়, “নাগৰিকত্ব সংশোধনী বিধেয়কখনক লৈ কৃষক মুক্তি সংগ্ৰাম সমিতিৰ নেতা অখিল গগৈয়ে কেতবোৰ মনেসজা ভিত্তিহীন উদ্দেশ্য প্ৰণোদিত মন্তব্যৰে ৰাজ্যৰ জনসাধাৰণৰ মাজত অপপ্ৰচাৰ কৰি এক আৱেগিক পৰিবেশৰ সৃষ্টি কৰিছে। কাৰণ এইক্ষেত্ৰত তেওঁৰ ৰাজনৈতিক উদ্দেশ্য জড়িত হৈ আছে।”
আনহাতে কৃষক মুক্তি সংগ্ৰাম সমিতিৰ নেতা অখিল গগৈ কমিউনিষ্ট যদিও নিজকে কমিউনিষ্ট বুলি পৰিচয় দিবলৈ লাজ পায় বুলি মুখপাত্ৰগৰাকীয়ে সংবাদমেলত কটাক্ষ কয়।
তেওঁ কয়, “অসমৰ ৰাইজৰ মাজত তেওঁ নিজকে কমিউনিষ্ট বুলি চিনাকি দি ৰাজনীতি নকৰে। ইয়াৰ উদাহৰণ হ’ল, কিছু দিন আগতে তেওঁ এটা ৰাজনৈতিক দল গঠন কৰিছিল। দলটো কৃষক মুক্তি সংগ্ৰাম সমিতিৰ বেনাৰতে গঠন হৈছিল আৰু অখিল গগৈ তাত মূল দায়িত্বত আছিল। কিন্তু আজি ৰাজনৈতিক দলটোৰ কোনো অস্তিত্ব নোহোৱা হ’ল।”
“অখিল গগৈয়ে ভালদৰে জানে, কমিউনিষ্টসকলক অসমৰ জনসাধাৰণে কেতিয়াও গ্ৰহণ নকৰে আৰু কেতিয়াও আদৰি নলয়। যেতিয়াই ৰাজনৈতিক পথাৰখনত তেওঁৰ গণভিত্তি নথকা বুলি বুজি পালে, তেতিয়াই তেওঁ পুনৰ কৃষক মুক্তি সংগ্ৰাম সমিতিলৈ ঘূৰি আহিল।” কৃষক নেতাগৰাকীক উদ্দেশ্যি এইদৰে কয় বিজেপিৰ ৰাজ্যিক মুখপাত্ৰগৰাকীয়ে।
জাতিধ্বংসী বিধেয়কখনৰ সপক্ষত থাকি ২০১৪ চনলৈকে ভাৰতলৈ অহা অমুচলিম বিদেশীসকলক সংস্থাপন দিব খোজা বিলখনক ‘অসমৰ ৰাইজৰ বাবে ক্ষতিকাৰক নহয়’ বুলি মত আগ বঢ়ায় সুভাষ দত্তই।
ৰাজ্যিক বিজেপিগৰাকীৰ মতে, “নাগৰিকত্ব সংশোধনী বিধেয়কখনত বিদেশৰ পৰা নতুনকৈ বিদেশী অনাৰ কথা উল্লেখ নাই। যুটীয়া সংসদীয় কমিটিয়ে তেওঁলোকৰ কোনো প্ৰতিবেদন এতিয়ালৈকে প্ৰকাশ কৰা নাই, কিন্তু তাৰ পাছতো কিছুমান ভুৱা তথ্যৰে অসমৰ ৰাইজক অখিল গগৈয়ে কৈছে যে বিদেশৰ পৰা এই বিধেয়কখনৰ জৰিয়তে অসমলৈ ২ কোটি জনতাক অনা হ’ব।”
আনহাতে, ২০১৪ চনত অখিল গগৈয়ে বিজেপি দলৰ সমৰ্থনত মন্তব্য কৰি বিজেপিক ভোট দিবলৈ কোৱা কথাষাৰ ‘অখিল গগৈৰ সুবিধাবাদী চৰিত্ৰ’ৰ প্ৰকাশ বুলি আখ্যা দিয়ে আজিৰ সংবাদমেলত।
অখিলক কটাক্ষ কৰি তেওঁ কয়, “যেতিয়া ৰাজনৈতিক আদৰ্শগত কোনো স্থিতি নাথাকে তেতিয়া অখিল গগৈৰ দৰে ব্যক্তিয়ে যিকোনো স্থিতি প্ৰকাশ কৰিব পাৰে। তেওঁ সেই সময়ত ভাৰতীয় জনতা পাৰ্টীক সমৰ্থন জনোৱাৰ প্ৰয়োজন নাছিল, কাশ্মীৰৰ পৰা কন্যাকুমাৰীলৈকে ভাৰতীয় জনতা পাৰ্টীৰ সমৰ্থনত জনসাধাৰণ একত্ৰিত হৈছিল। অখিল গগৈয়ে সেইসময়ত দেখিছিল জনসাধাৰণৰ ৰায় বিজেপিৰ পক্ষত আছিল, সেয়েহে তেওঁ সুবিধাবাদী স্থিতি গ্ৰহণ কৰি বিজেপি দলক সমৰ্থন জনাইছিল।”
তদুপৰি উক্ত সংবাদমেলতে তেওঁ অসমৰ বুদ্ধিজীৱীসকলো আক্ৰমণৰ লক্ষ্য কৰি লৈ কয়, “চীন আৰু পাকিস্তানক আওপকীয়াকৈ সমৰ্থন কৰা একাংশ বুদ্ধিজীৱীৰ নেতৃত্বত ৰাজ্য চৰকাৰখনৰ বিৰুদ্ধে সমালোচনা আৰম্ভ হৈছে। প্ৰধান মন্ত্ৰী নৰেন্দ্ৰ মোদী আৰু মুখ্য মন্ত্ৰী সৰ্বানন্দ সোণোৱালৰ নেতৃত্বত অসমখনক প্ৰগতিৰ দিশত আগুৱাই নিবৰ সময়তে কেতবোৰ মনেসজা ভিত্তিহীন উদ্দেশ্য প্ৰণোদিত বক্তব্যৰে ৰাজ্যখনৰ জনসাধাৰণৰ মাজত অপ-প্ৰচাৰ চলাইছে।”
উল্লেখযোগ্য যে শেহতীয়াকৈ অসমৰ পৰিস্থিতিৰ অৱনতিৰ এটা অন্যতম কাৰণ হ’ল ধৰ্ম, ভাষাৰ ভিত্তিত সাধাৰণ মানুহক মেৰুকৰণৰ ৰাজনীতি। ইয়াৰ পিছতো ৰাজ্যত চৰকাৰৰ দায়িত্ব লৈ থকা দলটোৱে আত্মসমালোচনা নকৰি আনৰ গাত বোকা ছটিওৱাহে দেখা গৈছে।
