চাকৰি নিয়মীয়াকৰণৰ দাবীৰে পুনৰ আন্দোলনত নামিব প্ৰাথমিক টেট উত্তীৰ্ণ শিক্ষক সমাজ
‘‘বিনাচৰ্তে বেতন সুৰক্ষাসহ চাকৰি নিয়মীয়াকৰণৰ দাবীৰে পুনৰবাৰ আন্দোলনত নামিব প্ৰাথমিক টেট উত্তীৰ্ণ শিক্ষক সমাজ,’’ এই মন্তব্য প্ৰাথমিক টেট উত্তীৰ্ণ শিক্ষক সমাজৰ সাধাৰণ সম্পাদক মিৰাজুল ৰচিদৰ।
মঙলবাৰে গুৱাহাটী প্ৰেছ ক্লাৱত এখন সংবাদমেল সম্বোধন কৰি এনেদৰে মন্তব্য কৰে প্ৰাথমিক টেট উত্তীৰ্ণ শিক্ষক সমাজৰ সাধাৰণ সম্পাদকগৰাকীয়ে।
অহা ১৯ নৱেম্বৰত প্ৰাথমিক টেট উত্তীৰ্ণ শিক্ষক সামাজে প্ৰতিখন জিলাৰ ‘জিলা মিশ্যন সমন্বয়ক’ৰ কাৰ্য্যালয়ত তলা বন্ধ কাৰ্য্যসূচী ৰূপায়ণ কৰিব বুলিও সংবাদ মেলত মিৰাজুলে উল্লেখ কৰে।
আনহাতে, তলাবন্ধ কাৰ্য্যসূচীৰ পাছতো যদি শিক্ষা বিভাগৰ গা নলৰে তেন্তে নৱেম্বৰ মাহতে তেওঁলোকে পুনৰ তিনিদিনীয়া “কৰ্ম বিৰতি” গ্ৰহণ কৰিব বুলি জনায়।
ৰাজ্য চৰকাৰে চাকৰি নিয়মীয়াকৰণ নকৰিলে গুৱাহাটীত ৪৮ ঘণ্টীয়া অনশন কাৰ্যসূচী ৰূপায়ণ কৰাৰ কথাও সংবাদমেলত উল্লেখ কৰে সাধাৰণ সম্পাদক গৰাকীয়ে।
উল্লেখযোগ্য যে, বিগত ২৪ অক্টোবৰত টেট উত্তীৰ্ণ শিক্ষক সমাজৰ দ্বাৰা শিক্ষা মন্ত্ৰী আৰু শিক্ষা বিভাগৰ উচ্চ পদস্ত বিষয়াৰ সৈতে পুনৰ আলোচনাত বহাৰ বাবে আবেদন জনাইছিল যদিও সেই আবেদনৰ প্ৰতি কোনোধৰণৰ সঁহাৰি নোপোৱাত তেওঁলোকে আন্দোলন কাৰ্যসূচী হাতত ল’বলৈ বাধ্য হোৱা বুলি ৰচিদে সদৰী কৰে।
“শিক্ষক সমাজৰ সমৰ্থন অবিহনে কোনো ব্যক্তি বা দলৰ সৈতে আলোচনা কৰি ঠিকাভিত্তিক টেট শিক্ষক সকলৰ ভৱিষ্যত অন্ধকাৰলৈ ঠেলি দিলে তাৰ বাবে শিক্ষা মন্ত্ৰী জগৰীয়া হ’ব আৰু এই সিদ্ধান্ত শিক্ষক সমাজে কেতিয়াও গ্ৰহণ নকৰে,” ৰচিদে কয়।