ৰাজ্যৰ বিভিন্ন বিভাগৰ ৪২ হাজাৰ পদত শীঘ্ৰে দিয়া হ’ব নিযুক্তি
অসম চৰকাৰে শীঘ্ৰে ৰাজ্যৰ বিভিন্ন বিভাগৰ ৪২ হাজাৰ পদত নিযুক্তিৰ কথা ঘোষণা কৰিব। বুধবাৰে এই কথা মুখ্যমন্ত্ৰী হিমন্ত বিশ্ব শৰ্মাই সংবাদ মাধ্যমৰ আগত অৱগত কৰে।
হিমন্ত বিশ্ব শৰ্মাই কয়, ‘অচিৰেই আমি বিভিন্ন বিভাগৰ ৪২ হাজাৰ পদৰ নিযুক্তি ঘোষণা কৰিম।
তৃতীয় আৰু চতুৰ্থ শ্ৰেণীৰ নিযুক্তি আয়োগৰ বৈঠকৰ অধ্যক্ষতা কৰি অসমৰ মুখ্যমন্ত্ৰীয়ে এই ঘোষণা কৰে।
মুখ্যমন্ত্ৰী শৰ্মাই কয় যে আমাৰ ১ লাখ চাকৰিৰ প্ৰতিশ্ৰুতি অনুসৰি এই আমি অসম চৰকাৰৰ বিভিন্ন বিভাগৰ ৪২ হাজাৰ পদৰ নিযুক্তি ঘোষণা কৰিম।
যোৱা ১৪ মাৰ্চত অসমৰ বিত্তমন্ত্ৰী অজন্তা নেওগেও উল্লেখ কৰিছিল যে মে’ মাহত কমেও ৪০ হাজাৰ চাকৰিৰ নিযুক্তি দিয়াৰ সম্ভাৱনা আছে। এতিয়া হিমন্ত বিশ্ব শৰ্মাৰ এই ঘোষণাই চাকৰি প্ৰত্যাশী প্ৰাৰ্থীসকলৰ বাবে আশাৰ ৰেঙনি কঢ়িয়াই আনিছে।
উল্লেখ্য যে, বিগত সময়ত অসম লোকসেৱা আয়োগৰ লগতে ৰাজ্যৰ বিভিন্ন বিভাগ যেন স্বাস্থ্য, শিক্ষা, আৰক্ষী, বন আদি বিভাগৰ তৃতীয় আৰু চতুৰ্থ শ্ৰেণীৰ পদৰ বাবে কেইবাটাও নিযুক্তি পৰীক্ষা অনুষ্ঠিত হৈছে। এই পৰীক্ষা সমূহৰ ফলাফল এতিয়াও ঘোষণা কৰা হোৱা নাই যদিও হিমন্ত বিশ্ব শৰ্মাৰ এই ঘোষণাই এই কথা নিশ্চিত কৰিছে অতি সোনকালেই হৈ যোৱা পৰীক্ষা সমূহৰ ফলাফল ঘোষণা কৰাৰ সম্ভাৱনা আছে।
আনহাতে, অহা কিছুদিনৰ ভিতৰতেই আৰক্ষীৰ উপপৰিদৰ্শক, সহকাৰী কাৰাগাৰ পৰিদৰ্শক, স্বাস্থ্য বিভাগৰ তৃতীয় বৰ্গ আদি পদৰ নিযুক্তি পৰীক্ষা অনুষ্ঠিত হ’ব। গতিকে, এই সকলো বোৰ পৰীক্ষাৰ ফলাফল ঘোষণা কৰি একেলগে নিযুক্তি প্ৰদান কৰাৰ সম্ভাৱনা আছে।