আমেৰিকাৰ ৰাজপথৰ দৰে অসমত নিৰ্মাণ কৰা হ’ব ৰাষ্ট্ৰীয় ঘাইপথ। বিশ্বমানৰ ৰাষ্ট্ৰীয় ঘাইপথ নিৰ্মাণৰ বাবে অসম কেন্দ্ৰ চৰকাৰৰ পৰা লাভ কৰিব ৩ লাখ কোটি টকা। ৰাজ্যসভাত কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে কৰিছে এই ঘোষণা।
সংসদৰ প্ৰশ্ন ঘণ্টাত গাডকাৰীয়ে তেওঁৰ মন্ত্ৰালয়ৰ পথ প্ৰকল্পৰ বাবে ধনৰ অভাৱ নাই বুলি আশ্বাস দিয়াৰ লগতে অসমৰ ঘাইপথৰ আন্তঃগাঁথনি সম্পূৰ্ণ পৰিৱৰ্তন হ’ব বুলি জানিবলৈ দিয়ে।
কেন্দ্ৰীয় মন্ত্ৰীগৰাকীয়ে জনোৱা মতে, গুৱাহাটী ৰিং ৰোড নিৰ্মাণৰ বাবে ৫,৮০০ কোটি টকা ব্যয় কৰা হ’ব। ২০২৭ চনৰ ভিতৰত এই পথ নিৰ্মাণৰ কাম শেষ কৰা হ’ব।
ডিব্ৰুগড়ৰ ব্ৰহ্মপুত্ৰ নদীৰ সুৰংগৰ বাবে আনুমানিক ব্যয় ১২,০০০ কোটি টকা ব্যয় কৰা হ’ব।
কাজিৰঙা ৰাষ্ট্ৰীয় উদ্যানৰ ওপৰত উৰণ সেঁতু নিৰ্মাণৰ বাবেও বাধাহীন পুঁজি যোগান ধৰা হ’ব।
গাডকাৰীয়ে লগতে কয় যে এই প্ৰকল্পসমূহে সংযোগ বৃদ্ধি কৰিব, চাকৰিৰ সৃষ্টি কৰিব আৰু উত্তৰ-পূবৰ অৰ্থনৈতিক বিকাশৰ ক্ষেত্ৰত সহায় কৰিব।
