অসমৰ তিনি যুৱকে শিৱসাগৰৰ ঐতিহাসিক শিৱদৌলৰ পৰা পৱিত্ৰ কেদাৰনাথ মন্দিৰলৈ চাইকেলেৰে এক দুঃসাহসিক যাত্ৰা আৰম্ভ কৰিছে। এই যাত্ৰাৰ মাধ্যমেৰে তেওঁলোকে নিচামুক্ত অসম গঢ়াৰ সংকল্পৰ লগতে সমাজত সমন্বয় আৰু ঐক্যৰ বাৰ্তা প্ৰচাৰ কৰাৰ লক্ষ্যও আগত ৰাখিছে। সোমবাৰে পুৱা শিৱসাগৰৰ শিৱ মন্দিৰত তেওঁলোকৰ এই দীৰ্ঘ যাত্ৰা আৰম্ভ কৰিছে।
সাহসি যুৱক তিনিজন হ’ল শিৱসাগৰৰ হাঁহচৰাৰ ভাৰ্গৱ গগৈ, লক্ষীমপুৰৰ বচাগাঁৱৰ কুসুম্বৰ দাস আৰু ডিব্ৰুগড়ৰ মোহিন পাহাৰীয়া। তেওঁলোকৰ এই প্ৰায় দেড় মাহৰ যাত্ৰা শাৰীৰিক দুঃসাহসৰ প্ৰকাশৰ লগতে সামাজিক সচেতনতাৰ সৃষ্টিৰ এক শক্তিশালী মাধ্যম হৈ পৰিছে। পৱিত্ৰ কেদাৰনাথ মন্দিৰৰ দুৱাৰ ইতিমধ্যে ভক্তৰ বাবে মুকলি হোৱাৰ পৰিপ্ৰেক্ষিতত দেশৰ বিভিন্ন প্ৰান্তৰ পৰা তীৰ্থযাত্ৰীৰ সমাগম ঘটিছে।
তেওঁলোকে নিচাৰ কু-প্ৰভাৱৰ বিৰুদ্ধে সচেতনতা গঢ়ি তোলা আৰু সমাজত সৌহাৰ্দ্যৰ বাৰ্তা প্ৰচাৰ কৰাই এই যাত্ৰাৰ মূল উদ্দেশ্য বুলি উল্লেখ কৰিছে কৰিছে। যুৱক তিনিজনে তেওঁলোকৰ এই দুঃসাহসিক অভিযান সফল কৰাৰ বাবে ৰাইজৰ আশীৰ্বাদ আৰু সমৰ্থন কামনা কৰিছে, যাতে তেওঁলোকৰ বাৰ্তা সমাজৰ প্ৰতিটো স্তৰত প্ৰতিধ্বনিত হয়।
