ছনি টিভিৰ দ্বাৰা আয়োজিত আৰু অমিতাভ বচ্চনে আঁত ধৰা কৌন বনেগা ক্ৰোড়পতি-১০ৰ প্ৰথমগৰাকী কোটিপতি হিচাপে প্ৰতিযোগিতাখনৰ পৰা বিদায় ল’লে অসমৰ বিনীতা জৈনে। ২ অক্তোবৰৰ প্ৰতিযোগিতাত বিনীতা জৈনে চূড়ান্ত প্ৰশ্নটোৰ উত্তৰ দিব পৰা হ’লেই ৭ কোটি টকা লাভ কৰিল হেঁতেন।
মনত সন্দেহ থকা বাবেই ৭ কোটি টকীয়া প্ৰশ্নটোৰ উত্তৰ জানিও ৰিস্ক ল’ব নুখুজিলে বিনীতাই। এই কথা প্ৰতিযোগিতাখনৰ পিছত বিনীতা জৈনে প্ৰকাশ কৰিছে। কাৰণ ভুল উত্তৰে তেওঁ প্ৰতিযোগিতাখনত ইতিপূৰ্বে নিশ্চিত কৰা ১ কোটি টকাৰ ধনৰাশি ৩.৫ লাখ টকালৈ নমাই নিলে হেঁতেন।
বিনীতাই সন্মুখীন হোৱা চূড়ান্ত প্ৰশ্নটো আছিল :- Who invented the first stock ticker in 1867?
ইয়াৰ ৪টা বিকল্প আছিল এনে ধৰণৰ : A : Edward Calahan B : Thomas Edison, C : David Gestenter, D : Robert Berclay
শুদ্ধ উত্তৰটো আছিল A : Edward Calahan.
উল্লেখযোগ্য যে গুৱাহাটীৰ বিনীতা জৈনে প্ৰতিযোগিতাখনৰ ইয়াৰ আগৰ খণ্ডটোত ১ কোটি টকা লাভ কৰিছিল। পেচাত শিক্ষয়িত্ৰী জৈনে প্ৰতিযোগিতাখনৰ সময়ত আঁত ধৰোঁতা অমিতাভ বচ্চনক অসমীয়াৰ সন্মানৰ চিন গামোচা উপহাৰ দিয়ে।
