কাইলৈ অৰ্থাৎ শুকুৰবাৰে নিজ মাতৃভূমিত উপস্থিত হ’ব সদ্য সমাপ্ত জাকাৰ্টা এছিয়ান গেইমছত এটা সোণ আৰু দুটা ৰূপৰ পদক অৰ্জন কৰি দেশবাসীক গৌৰৱান্বিত কৰা অসম কন্যা হিমা দাস।
জানিব পৰা মতে কাইলৈ দিনৰ ১ বজাত গুৱাহাটীৰ বৰঝাৰ বিমান বন্দৰত উপস্থিত হ’ব হিমা। হিমাক আদৰিবলৈ তথা শুভেচ্ছা প্ৰদান কৰিবলৈ বিমান বন্দৰত উপস্থিত থাকিব অসমৰ মুখ্য মন্ত্ৰী সৰ্বানন্দ সোণোৱাল।
বৰঝাৰ বিমান বন্দৰৰ পৰা আহি প্ৰতিভাধৰ এথলীটগৰাকীয়ে জালুকবাৰীস্থিত সুধাকণ্ঠৰ সমাধিত শ্ৰদ্ধাঞ্জলি জনাই পোনে পোনে সৰুসজাই ইন্দিৰা গান্ধী এথলেটিক ষ্টেডিয়ামলৈ যাব বুলি জানিব পৰা গৈছে।
আনহাতে বিয়লি ৩.১৫ বজাত ৰাজ্যিক ক্ৰীড়া সঞ্চালকালয় কাৰ্যালয়ত এখন সংবাদমেল সম্বোধন কৰিব স্প্ৰীণ্টাৰ হিমাই। সংবাদমেলৰ পাছত হিমা উপস্থিত হ’ব শ্ৰীমন্ত শংকৰদেৱ কলাক্ষেত্ৰত।
উল্লেখ্য যে কাইলৈ কলাক্ষেত্ৰত ৰাজ্যিক মৰ্যাদাৰে হিমাক শুভেচ্ছা আৰু আদৰণি জনাব ৰাজ্য চৰকাৰে। গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’বলগীয়া সম্বৰ্ধনা অনুষ্ঠানত উপস্থিত থাকিব এছিয়াডত অসমক প্ৰথমটো পদকৰ সোৱাদ দিয়া অৰ্জুন ভোগেশ্বৰ বৰুৱাৰ লগতে সকলো মন্ত্ৰী-বিধায়ক।
