ডিব্ৰুগড় আৰু কাছাৰত নিৰ্মাণ হ’বলগা ‘ছাফাৰী জু’ পৰিকল্পনাত স্থগিতাদেশ উচ্চতম ন্যায়ালয়ৰ

অসম চৰকাৰে কোটি কোটি টকা খৰচ কৰি ডিব্ৰুগড় আৰু কাছাৰত নিৰ্মাণ কৰিবলগীয়া ‘ছাফাৰী জু’ৰ পৰিকল্পনাত চেঁচাপানী ঢালিলে দেশৰ সৰ্বোচ্চ ন্যায়ালয়ে।

সোমবাৰে উচ্চতম ন্যায়ালয়ে অসম চৰকাৰৰ এই পৰিকল্পনাক বেআইনী ঘোষণা কৰি স্থগিত ৰাখিবলৈ নিৰ্দেশ দিয়ে।

২০২৩ চনৰ বন সংৰক্ষণ আইন সংশোধনীক প্ৰত্যাহ্বান জনোৱা আবেদন গোটৰ শুনানি গ্ৰহণ কৰি সোমবাৰে শীৰ্ষ আদালতে এই অন্তৱৰ্তীকালীন নিৰ্দেশনা জাৰি কৰে।

উল্লেখ্য যে ২১৪.৫৪ কোটি টকা ব্যয়েৰে কল্পনা কৰা কাছাৰ ছাফাৰী-চিৰিয়াখানাখন শিলচৰৰ পৰা প্ৰায় ৩০ কিলোমিটাৰ দূৰত্বত ১৮০ হেক্টৰ বনাঞ্চলত নিৰ্মাণ কৰাৰ কথা আছিল।

একেদৰে ডিব্ৰুগড়ত নামডাং সংৰক্ষিত বনাঞ্চলত প্ৰায় ১৫০ হেক্টৰ ভূমিত আনুমানিক ২৫০ কোটি টকাৰ ব্যয়েৰে এই ছাফাৰী নিৰ্মাণ কৰাৰ কথা আছিল।

আদালতৰ স্পষ্ট অনুমতি নোপোৱালৈকে অসম চৰকাৰে এই প্ৰকল্প দুটা স্থগিত ৰাখিব লাগিব।