পেঞ্চন সংস্কাৰ বিধেয়কৰ বিৰুদ্ধে ফ্ৰান্সত প্ৰতিবাদকাৰীৰ সৈতে হোৱা সংঘৰ্ষত শতাধিক আৰক্ষী আহত হৈছে। সোমবাৰে মে’ দিৱসৰ দিনা সমগ্ৰ দেশতে বিক্ষোভৰ আয়োজন কৰা হয়। এই দিনটোত সমগ্ৰ ফ্ৰান্সত সংঘটিত হোৱা সংঘৰ্ষৰ ঘটনাত ইমান বৃহৎ সংখ্যক লোক আহত হয়।
তদুপৰি, প্ৰতিবাদৰ সময়ত ব্যাপক হিংসা সংঘটিত হয় আৰু প্ৰায় ৩০০ লোকক গ্ৰেপ্তাৰ কৰা হয়। মঙলবাৰে বিবিচিৰ বাতৰিত এই তথ্য প্ৰকাশ পাইছে।
লগতে পঢ়ক: কৃত্ৰিম বুদ্ধিমত্তা ভয়ংকৰ! নিজৰ কামৰ বাবে অনুশোচনা কৰি গুগল এৰিলে AI ‘গডফাদাৰ’ হিণ্টনে
ফ্ৰান্সৰ ৰাষ্ট্ৰপতি ইমানুৱেল মেক্ৰনৰ শেহতীয়া পেঞ্চন সংস্কাৰক লৈ ক্ষুব্ধ প্ৰতিবাদকাৰীৰ সৈতে সমগ্ৰ ফ্ৰান্সত সংঘৰ্ষত কমেও ১০৮জন আৰক্ষী বিষয়া আহত হৈছে বুলি গৃহ মন্ত্ৰী জেৰাল্ড ডাৰমানিনে জানিবলৈ দিয়ে।
তেওঁ কয় যে ফ্ৰান্সত প্ৰতিবাদকাৰীৰ সৈতে সংঘৰ্ষত ইমান বৃহৎ সংখ্যক আৰক্ষী বিষয়া আহত হোৱাটো বিৰল। লগতে এই হিংসাত্মক ঘটনাৰ সময়ত ২৯১ জন লোকক গ্ৰেপ্তাৰ কৰা বুলিও তেওঁ জানিবলৈ দিয়ে।
বাতৰি অনুসৰি, ৰাষ্ট্ৰপতি ইমানুৱেল মেক্ৰনৰ শেহতীয়া পেঞ্চন সংস্কাৰৰ বিৰুদ্ধে মে’ দিৱসৰ প্ৰতিবাদত সমগ্ৰ ফ্ৰান্সত লাখ লাখ লোকে অংশগ্ৰহণ কৰিছিল। সোমবাৰৰ প্ৰতিবাদ বেছিভাগেই শান্তিপূৰ্ণ আছিল যদিও উগ্ৰপন্থী গোটে আৰক্ষীৰ ওপৰত পেট্ৰ’ল বোমা আৰু জুই নিক্ষেপ কৰে।
লগতে পঢ়ক: পুৱাই তিহাৰ জেলৰ কয়েদীৰ মাজত সংঘৰ্ষ; নিহত গেংষ্টাৰ টিল্লু তাজপুৰীয়া
ইয়াৰ প্ৰত্যুত্তৰত আৰক্ষীয়ে কন্দুৱা গেছ আৰু পানীৰ কামানেৰে প্ৰতিক্ৰিয়া প্ৰকাশ কৰে। কিন্তু প্ৰতিবাদ আৰু সংঘৰ্ষত কিমানজন প্ৰতিবাদকাৰী আহত হয় সেয়া স্পষ্ট হোৱা নাই।
