এক ভয়ংকৰ ৰে’ল দুৰ্ঘটনাত অতি কমেও ৩২ গৰাকী যাত্ৰীৰ কৰুণ মৃত্যু ঘটিছে।
এই ভয়াৱহ যাত্ৰীবাহী ৰে’ল দুৰ্ঘটনাটো সংঘটিত হৈছে ইজিপ্তৰ তাহটা নামৰ চহৰত।
ইজিপ্তৰ ৰে’লেৱ কৰ্তৃপক্ষই প্ৰকাশ কৰা অনুসৰি কোনো অজ্ঞাত লোকে যাত্ৰীবাহী ৰে’লখনৰ সন্মুখৰ ব্ৰেক সক্ৰিয় থোৱাৰ ফলত এই ভয়াৱহ ৰে’ল দুৰ্ঘটানটো সংঘটি হয়। দুৰ্ঘটনাটো ৰাজধানী কাইৰো চহৰৰ পৰা ৩৬৫ কিলোমিটাৰ দক্ষিণাঞ্চলত সংঘটিত হৈছে।
ইফালে এই ভয়ংকৰ ৰে’ল দুৰ্ঘটনাটো সংঘটিত হোৱাৰ পিছতে ইজিপ্তৰ ৰাষ্ট্ৰপতি আব্দুল ফাটাহ অল-ছিছিয়ে এই ঘটনাত জড়িত লোকসকলক কঠোৰ শাস্তি বিহা হ’ব বুলি ঘোষণা কৰিছে।
“যিসকল ব্যক্তিৰ অৱহেলা, দুৰ্নীতি বা তদ্ৰূপ কাৰকৰ বাবে এই শোকাৱহ দুৰ্ঘটনা সংঘটিত হৈছে, তেওঁলোক শীঘ্ৰেই দৃষ্টান্তমূলক শাস্তি ভোগ কৰিব লাগিব।” ৰাষ্ট্ৰপতিগৰাকীয়ে টুইট কৰি এইদৰে কয়।
বিবিচিএ প্ৰকাশ কৰা অনুসৰি দুৰ্ঘটনাটো সংঘটিত হোৱাৰ পিছতে ৭০ খন এম্বুলেঞ্চ দু্ৰ্ঘটনাস্থলীলৈ প্ৰেৰণ কৰা হয়। আৰু আহত যাত্ৰীক উদ্ধাৰ কৰি এম্বুলেঞ্চলমূহেৰে চিকিৎসালয়ত ভৰ্তি কৰোৱা হৈছে।
কিমান যাত্ৰী আহত হৈছে সেয়া এতিয়াও জানিব পাৰ হোৱা নাই। ইফালে সংবাদ সংস্থা ৰয়টাৰক স্থানীয় লোকে কয় যে “আমি বিচাৰিছো আচলতে ইয়াত কি ঘটিছে চাবলৈ চৰকাৰী পক্ষৰ মানুহ আহক। আৱদ্ধ হৈ থকা মানুহক আমি উদ্ধাৰ কৰাত ব্যৰ্থ হৈছো।”
ইয়াৰ পিছতে ইজিপ্তৰ প্ৰধানমন্ত্ৰী মুস্তাফা মাদবৌলীয়ে দুৰ্ঘটাস্থলীত উপস্থিত হৈ দুৰ্ঘটনাত পতিত পৰিয়ালসমূহক আৰ্থিক সাহায্য প্ৰদান কৰা হ’ব বুলি ঘোষণা কৰিছে।
উল্লেখ্য যে উজিপ্তৰ ৰে’লৱে আন্তঃগাঁঠনি নিৰ্মাণৰ সুৰুঙাৰ বাবে বিভিন্ন সময়ত ৰে’ল দুৰ্ঘটনা সংঘটিত হৈ আহিছে। দেশখনৰ দক্ষিণ কাইৰোত ২০০২ চনত সংঘটিত হোৱা এক ৰে’ল দুৰ্ঘটনাত ৩৭৩ গৰাকী যাত্ৰীৰ মৃত্যু হৈছিল।
