মহাৰাষ্ট্ৰত এখন বাছ পাহাৰৰ পৰা খাৱৈত পৰি কমেও ৭ জন লোকৰ মৃত্যু হৈছে। গুৰুতৰভাৱে আঘাতপ্ৰাপ্ত হৈছে ১৫জন। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে। দেওবাৰে পুৱা ৫:৩০ বজাত নাছিক-গুজৰাট ঘাইপথৰ ২০০ ফুট দ খাৱৈত বাগৰি পৰে লাক্সাৰী বাছখন।
দুৰ্ঘটনাৰ খবৰ পোৱাৰ পিছতে আৰক্ষী আৰু দুৰ্যোগ সঁহাৰি দলৰ কৰ্মী ততাতয়াকৈ ঘটনাস্থলীত উপস্থিত হয়। দুৰ্ঘটনাত পতিত বাছখনৰ পৰা আহত যাত্ৰীসকলক উদ্ধাৰ কৰি স্থানীয় চিকিৎসালয়লৈ প্ৰেৰণ কৰা হয়। বাকী যাত্ৰীসকলকো খাৱৈৰ পৰা তুলি অনা হৈছে।
জানিব পৰা মতে, বাছখন মহাৰাষ্ট্ৰৰ ত্ৰিম্বকেশ্বৰৰ পৰা গুজৰাটৰ দ্বাৰকালৈ গৈ আছিল। যাত্ৰীসকল তীৰ্থ দৰ্শনলৈ ওলাই গৈছিল। আজি পুৱা প্ৰায় ৫:৩০ বজাত নাছিক-গুজৰাট ঘাইপথেৰে যাওঁতে বাছখন ওচৰৰ পাহাৰীয়া খাৱৈত বাগৰি পৰে।
প্ৰত্যক্ষদৰ্শীয়ে জনোৱা মতে, দুৰ্ঘটনাটোত জড়িত বাছখন দুটুকুৰা হৈ পৰে। আটাইকেইজন যাত্ৰী গুৰুতৰভাৱে আহত হয়। ইয়াৰে ৭ জনৰ মৃত্যু হৈছে। বাকী গুৰুতৰভাৱে আহতসকলক ওচৰৰ চিকিৎসালয়ত ভৰ্তি কৰা হৈছে।
জানিব পৰা মতে, আটাইকেইজন বাছ যাত্ৰী মধ্যপ্ৰদেশৰ গুনা, শিৱপুৰী আৰু অশোকনগৰৰ বাসিন্দা। ২৩ ডিচেম্বৰৰ পৰা চল্লিশজন তীৰ্থযাত্ৰীয়ে এই তীৰ্থযাত্ৰাৰ বাবে ৰাওনা হৈছিল। চাৰিখন বাছত উঠি মধ্যপ্ৰদেশ, উত্তৰ প্ৰদেশ, মহাৰাষ্ট্ৰ, গুজৰাটৰ তীৰ্থস্থানলৈ যোৱাৰ পৰিকল্পনা আছিল। সেই চাৰিখন বাছৰ ভিতৰত এখন আজি পাহাৰৰ খাৱৈত পৰিল।
এই দুৰ্ঘটনা কেনেকৈ সংঘটিত হ’ল সেয়া এতিয়াও স্পষ্ট হোৱা নাই। প্ৰথম অৱস্থাত পুৱাৰ ভাগত কুঁৱলী বেছি আছিল বুলি ধাৰণা কৰা হৈছে। চালকৰ চকুতো টোপনিৰ ভাৱ আহিছিল। ফলত তেওঁ নিয়ন্ত্ৰণ ৰাখিব নোৱাৰিলে। পথৰ কাষৰ ২০০ ফুট দ খাৱৈত বাগৰি পৰে বাছখন। যুদ্ধকালীনভাৱে উদ্ধাৰ অভিযান চলি আছে।
